ကလေးများနဲ့ ကလေးကဗျာ

ပြီးခဲ့တဲ့ တပတ်က ဧရာဝတီမှာ ကလေးတို့ကို ပုံပြင်လေးတွေ ဖတ်ပြဖို့နဲ့၊ ပုံပြင်လေးတွေ အရေးကြီးတဲ့ အကြောင်းကို ကျမ ရေးခဲ့ပါတယ်။ ကလေးတို့ အတွက် ပုံပြင်လေးတွေလိုပဲ အရေးကြီးတဲ့ အရာကတော့ ကလေးတို့ ဖတ်ဖို့ ကလေး ကဗျာပါပဲ။ ကလေးကဗျာဟာ ကလေးတို့အတွက် ပုံပြင်လိုပဲ အရေးကြီး ပါတယ်။

ဖွံ့ဖြိုးပြီး နိုင်ငံများမှာတော့ ပုံပြင်လိုပဲ ကလေး တွေဖတ်ဖို့ ကဗျာလေးတွေ၊ ကလေးတွေ ဆိုဖို့ သီချင်း ကဗျာလေးတွေ အများကြီး ရှိကြပါတယ်။ ကျမတို့ ဆီမှာတော့ ဆရာမင်းသုဝဏ်တို့၊ ဒေါက်တာ မောင်ဖြူးတို့ ရေးပေးသွားကြတဲ့ ကလေး ကဗျာ အနည်းအကျဉ်းနဲ့ နောက်ပိုင်း ကဗျာဆရာတွေ ကြိုးကြားကြိုးကြား ရေးပေးကြတဲ့ ကလေးကဗျာလေး တွေ ခပ်နည်းနည်းလောက်ပဲ ရှိပါသေးတယ်။

အဲဒီ ခပ်နည်းနည်းလောက်ပဲရှိတဲ့ ကဗျာများဟာလည်း ကလေးတွေ လက်ထဲကို မရောက်ရတာ များပါတယ်။ ဘာကြောင့်လဲ ဆိုတော့ ကျမတို့ဆီက မိဘ အများစုဟာ ကလေးတွေကို ကဗျာလေးတွေ ဖတ်ပြဖို့နဲ့ ကဗျာလေးတွေ ရွတ်ပြဖို့ကို အင်္ဂလိပ်စာတွေ သင်ဖို့လောက်၊ ဝလုံးတွေ၊ ကကြီး ခခွေးတွေ သင်ဖို့လောက် သိပ်စိတ် မဝင်စားကြလို့ပါပဲ။

တကယ်တော့ ကလေးတို့ကို ကဗျာရွတ်ပြဖို့နဲ့ ကဗျာဖတ်ပြဖို့ဆိုတဲ့ ကိစ္စဟာ ကလေးတွေကို ဝလုံး လေးတွေ ရေးခိုင်း ဖို့ထက် ပိုပြီးတော့ အရေးကြီးပါတယ်။ ဘာကြောင့်လဲဆိုတော့ ကဗျာမှာက အသံတွေ၊ ကာရန်လေးတွေ ပါတာမို့ ကလေးတို့ဟာ  ကဗျာဖတ်ရင်းနဲ့ ကာရန်လေးတွေကို နားလည်သွား ကြလို့ပါပဲ။

ကာရန်နဲ့ အသံဟာ ကလေးတို့ရဲ့ စာသင်ကြားရေး (စာဖတ်နိုင်မှုမှာ) အင်မတန်မှ အရေးပါတဲ့၊ အရေးကြီးတဲ့ အရာပါ။ ကာရန်နဲ့ အသံကို သိတဲ့ ကလေးတယောက်ဟာ အင်္ဂလိပ်စာပဲ သင်သင်၊ မြန်မာစာပဲ သင်သင် စာဖတ်တတ်ဖို့ သိပ်လွယ် ပါတယ်။ အသံနဲ့ ကာရန်ကို သိထားပြီ ဆိုရင်ဖြင့် အ အာ အားကို သင်ပြီးတာနဲ့ တပြိုင်နက်တည်း ကလေးဟာ ကကြီးဆိုရင် က ကာ ကား၊ ခခွေး ဆိုရင် ခ ခါ ခါး စသဖြင့် သိသွားတော့ တာပါပဲ။

နောက်တခုကတော့ ကလေးကဗျာများဟာ ကလေးတို့ အတွက် ကာရန်တခုတည်း သိစေတာ မဟုတ်ပါဘူး။ ကလေးတို့ အတွက် သိသင့်သိထိုက်တဲ့ အရောင်တွေ၊ ပတ်ဝန်းကျင် အကြောင်းတွေ သာမက တစ် နှစ် သုံး လေး၊ အပေါင်း အနုတ် စတာလေးတွေကိုပါ ကဗျာလေးတွေကို ရွတ်ရင်းနဲ့ သိနားလည်သွား စေပါတယ်။

ဥပမာ – “ကောင်းကင်ကြီးက သိပ်လှတယ်

အပြာရောင်ပဲကွယ်။

သစ်ပင်များနဲ့ မြက်ပင်များ

အစိမ်းရောင်တဲ့ဗျား။

လကလေးက ဖွေးဖွေးဖြူ

စံပယ်ပန်းနဲ့တူ”

အစချီတဲ့ ကဗျာလေးကို ဖတ်လိုက်၊ ရွတ်လိုက်တဲ့ ကလေးတယောက်ဟာ သူ့ပတ်ဝန်းကျင်က မိုးကောင်းကင်၊ သစ်ပင်၊ လနဲ့ စံပယ်ပန်းတို့ရဲ့ အရောင် လေးတွေကို သိနားလည်သွားပါတော့တယ်။ ဒါဟာ ကလေးတို့ရဲ့ ပညာရေးမှာ အရေးကြီးတဲ့ စွမ်းရည်တခု ဖြစ်တဲ့ သတိပြု စူးစမ်း မှတ်သားတတ်မှု (Awareness) ကို သိသွား တာပါပဲ။

ဆရာမင်းသုဝဏ် ရေးတဲ့ ငှက်ကလေးတွေ အကြောင်း ကဗျာ၊ ဒေါက်တာမောင်ဖြူးရဲ့

အိမ်ခြံတဲဘေး

ဖြူဖြူဖွေး

ဘယ်သူ့ဥကလေး။

စသဖြင့် အစချီထားတဲ့ ဖြူတုတ် ဘဲကလေး ကဗျာ။

အရိပ်ကလေး အရိပ်ကလေး

သီတာ့ အရိပ်ကလေး

သီတာ့နောက်ကို ကောက်ကောက်ပါ

ရှက်ပဲ မရှက်ပါ။

စသဖြင့် အစချီထားတဲ့ အရိပ်ကလေး ကဗျာ၊ စတဲ့ ကဗျာလေးတွေဟာလည်း ကဗျာလေးတွေကို ဖတ်ရင်း၊ ရွတ်ရင်းနဲ့ ပတ်ဝန်းကျင်ကို သူတို့လေးတွေ ကိုယ်တိုင် သတိပြု စူးစမ်းမှတ်သား တတ်စေဖို့ အတွက် ဆွဲခေါ်လေ့ကျင့်ပေးနိုင်တဲ့ ကဗျာလေးတွေပါ။

ဒီလိုပဲ သင်ကြားရေးနဲ့ ပတ်သတ်လို့ တစ် နှစ်  စာကိုချစ်၊ သုံး လေး မသိတာမေး … စတဲ့ ကလေး ကဗျာလေးတွေ၊ တစ်တီတူးလေး သုံးကောင် လယ်ကွင်းထဲမှာနေ၊ တကောင်ပျံသွားသောအခါ နှစ်ကောင်က ကျန်နေ စတဲ့ကဗျာလေး တွေဟာ အပေါင်း အနုတ်နဲ့ သင်္ချာကို သင်ပေးတဲ့ ကဗျာလေးတွေပါ။

ဆရာမင်းသုဝဏ်နဲ့ ဒေါက်တာမောင်ဖြူးရဲ့ ကလေးကဗျာလေးတွေဟာ ကလေးတို့ဝန်းကျင်က မြင်သမျှ၊ တွေ့သမျှ လေးတွေကို ကလေးတို့ သတိပြု မိအောင်လို့ စိတ်ဝင်စားဖွယ်၊ ချစ်စဖွယ်နဲ့ ရေးစပ် ထားရုံတင် မကပါဘူး။ ကလေးတို့ရဲ့ စိတ်ကူးစိတ် သန်းထဲက လုပ်ချင်တတ်တဲ့၊ လုပ်တတ်တဲ့ အလုပ်ကလေးတွေတောင်မှ ရေးဖွဲ့ထား လိုက်ပါသေးတယ်။

ဥပမာ “ခေါင်းအုံးကြီး၊ ခေါင်းအုံးကြီး၊ မြင်းပျံ လုပ်လို့စီး ဆိုတဲ့ ဆရာမင်းသုဝဏ် ကဗျာနဲ့ ဒေါက်တာမောင်ဖြူးရဲ့ ဟိုးဟေးဟေး ကဗျာတို့ဟာ ဆိုရင်ဖြင့် ကလေးတို့ ကစားတတ်တဲ့ အတုယူ ဟန်ဆောင်ကစား နည်း (Pretend Play) ကို အခြေခံပြီးတော့ ရေးဖွဲ့ထားတဲ့ ကဗျာများပါပဲ။

တကယ်တော့ ပျောက်လုခမန်း ဖြစ်နေပြီဖြစ်တဲ့ ဒီလို ကဗျာလေးတွေကို ကျမ တို့ ထိန်းသိမ်းဖို့ လိုသလို ကလေးတွေ ကို အိပ်ရာဝင် ကဗျာလေးတွေ အဖြစ်နဲ့ ဖတ်ပြဖို့ သိပ်ကိုမှ ကောင်းတဲ့ ကဗျာများပါပဲ။

ကလေးတို့ရဲ့ ဦးနှောက် ကလေးတွေ ဖွံ့ဖြိုး သန်မာလာစေဖို့ (တနည်းပြောရရင်) ဉာဏ်ကောင်းလာစေဖို့ အတွက် ကလေးတို့ရဲ့ အစောပိုင်း ကာလအချိန် (Earky Childhood) ကာလမှာ လှုံ့ဆော်မှု များများလုပ်ဖို့ လိုတဲ့ ကာလပါ။ ကလေးတို့ ဦးနှောက် ဖွံ့ဖြိုး ကြီးထွားလာစေဖို့ အတွက် ကလေးများကို ပုံပြင်စာအုပ်လေးတွေ ဖတ်ပြဖို့နဲ့ ကဗျာလေးတွေ ဖတ်ပြဖို့လိုတယ်လို့ ကလေး စိတ်ပညာရှင်များနဲ့ ဦးနှောက်ပိုင်း ဆိုင်ရာ ပညာရှင်များက ဆိုပါတယ်။

ကလေးတို့ ဦးနှောက်ဖွံ့ဖြိုးဖို့ အတွက် လှုံ့ဆော်မှု များများ လုပ်ပေးရမယ့် အချိန်မှာ ကလေးတို့ရဲ့ မူကြို ကျောင်းတွေမှာ ကလေးတွေကို ထိုင်ခုံလေးတွေမှာ  ထိုင်ခိုင်းပြီးတော့ ဝလုံးလေးတွေကို စာမျက်နှာ အပြည့် ရေးခိုင်းတာဟာ တကယ်တော့ မှားယွင်းတဲ့ သင်ကြားရေး စနစ်ပါ။

ဒေါက်တာ မောင်ဖြူးကတော့ သူ့ရဲ့ “နှစ်နှစ်ခွဲ အရွယ်ဖတ်စာများ” ဆောင်းပါးမှာ “စာရေးသင် သောနည်းဖြင့် စာဖတ် သင်ခြင်းမှာ အကျိုးရှိသည်ထက် အကျိုးယုတ်ပါသည်။ အကျိုးယုတ်သည်ကား စာဖတ်နှေးမှုတည်း” လို့ ရေးထားပါ တယ်။

ကလေး တို့ကို စာရေးဖို့ အတွက် အားထုတ်နေတာ ထက်စာရင် ကလေးတို့ကို စာများများ ဖတ်ပြတာမျိုး၊ ကဗျာလေး တွေ ဖတ်စေတာမျိုးက  ကလေးတို့ စာတတ်ဖို့ အတွက် အလွယ်ကူဆုံး နည်းပါပဲလို့ ဒေါက်တာမောင်ဖြူးက ဆိုပါတယ်။

ကဗျာလေးတွေ၊ စာလေးတွေကို ဖတ်ပြရင်းနဲ့ ကလေးတို့ ကိုယ်တိုင် စာလုံးလေးတွေကို မှတ်မိပြီးတော့ စာဖတ်တတ် လာမှုကို ဆရာကြီးက ယုံသလို၊ သူ့သမီးဖြစ်သူ သီတာ့ကိုလည်း ခြောက်နှစ်ခွဲ အရွယ်ထိ ကျောင်းမထား၊ စာမသင်ဘဲနဲ့ စာတွေ ကဗျာတွေကိုသာ ဖတ်ပြ၊ ဖတ်ခိုင်းခဲ့တယ်လို့ ဆရာကြီးရဲ့ဆောင်းပါးများမှာ ဖတ်ခဲ့ရပါတယ်။

ကျမ ကိုယ်တိုင်လည်း ကျမရဲ့သားကို မူကြိုမှာ ဝလုံး မရေးခိုင်းခဲ့ပါဘူး။ သားကို စာဖတ်ပြ၊ ကဗျာတွေ ဖတ်ပြခဲ့တဲ့ နည်းနဲ့ပဲ စာကိုသင်ကြားခဲ့တာပါ။ သားဟာ အ အာ အား လို့ သင်ပြီးသွားတာနဲ့ က ကြီး ဆိုရင် က ကာ ကား ကို သိပါတယ်။

အဲဒီလိုပဲ ဝဆွဲ သံဆိုရင် ကကြီးဝဆွဲ ကွ ဆိုတာကို သူ ထွက်တတ်လာပါတယ်။ စာဖတ်ရင်းနဲ့ပဲ စာလုံးလေးတွေကို မှတ်မိတာမို့ တော်တော်များများကို သူပေါင်း မဖတ်ချင်ပါဘူး။ စာများများဖတ်ရင်းနဲ့ပဲ စာလုံးလေးတွေ မှတ်မိလာတာ၊ သိသိလာတာဟာ စာကို ပိုပြီးတော့ သွားစေတယ်လို့ ဆရာကြီး ပြောခဲ့တာ တကယ် မှန်ကန်တဲ့ နည်းပါလားလို့ ကြည်ညိုစိတ် ဝင်ခဲ့ရပါတယ်။

ဒါကြောင့် မို့လို့ ကလေးတို့ကို အချိန် မတန်ခင်မှာ ဝလုံးလေးတွေ၊ ကကြီးခခွေးတွေ ရေးခိုင်းမယ့် အစား စာအုပ် လေးတွေ ဖတ်ပြ၊ ကဗျာလေးတွေ ဖတ်ပြ၊ ရွတ်ပြရင်းနဲ့ စာဖတ်တတ် သွားစေတဲ့ နည်းလေးနဲ့ ကလေးတို့ကို သင်ကြားကြည့်ပါဦးလို့ ကျမ တိုက်တွန်းချင်ပါတယ်။

ကလေးတို့ကို စာအုပ်လေးတွေ၊ ကဗျာလေးတွေ ဖတ်ပြရင်းနဲ့ပဲ ကလေးတို့ဟာ စာလုံးလေးတွေကို မှတ်မိပြီးတော့ စာကို သိလာမယ့် အပြင် ကလေးတို့ အတွက် လိုအပ်တဲ့၊ သိသင့်တဲ့ အရာလေးတွေကို ကဗျာလေးတွေ၊ စာအုပ်လေး တွေက တဆင့် သိသွားစေတာမို့ ကလေးတို့ကို ကဗျာလေးတွေ ရွတ်ခိုင်း၊ စာအုပ်လေးတွေ ဖတ်ခိုင်းပေး ကြပါဦး။     ။

ခေတ်ဘုန်းသစ်

မိုဘိုင်းဖုန်းသုံးစွဲမှုနှင့် ကလေးတို့၏ ပညာရေး

မြန်မာနိုင်ငံတွင် တစ်နေ့တခြား မိုဘိုင်းဖုန်းများ တွင်ကျယ်သည်ထက် တွင်ကျယ်၍ လာနေပြီး မြို့ကြီးများ၏ နေရာအနှံ့အပြား၌ ဟန်းဆက်ဆိုင်များကို မြင်တွေ့လာရသည်။ ယခင်က ခေတ်စားခဲ့သော အင်တာနက်ဆိုင်များ၏နေရာ၌ ဖုန်းဟန်းဆက်ဆိုင်များ ဝင်ရောက်နေရာယူလာသည်ဟုပင် ဆိုရမည်။ အရွယ်မရောက်သေးသည့် ကလေးများသည်ပင်လျှင် ဖုန်းများ တကိုင်ကိုင်လုပ်နေသည်ကို တွေ့မြင်ရမည်ဖြစ်သည်။ ထို့ကြောင့် မိုဘိုင်းဖုန်းသုံးစွဲမှုနှင့် ကလေးတို့၏ပညာရေး ဆက်နွှယ်ချက်ကို ဆန်းစစ်ကြည့်ရန် လိုလာသည်။

ဖွံ့ဖြိုးဆဲနိုင်ငံများ၌ အထူးသဖြင့် ကျေးလက်ဒေသနှင့် ဝေးလံသီခေါင်သောနေရာများတွင် အရည်အသွေးရှိသော ပညာရေးကို ဖြန့်ချိရန်အတွက် အရေးပါသောစိန်ခေါ်မှုများ ရှိနေဆဲဖြစ်သည်။ ယင်းစိန်ခေါ်မှုများကို ဖြေရှင်းရန် ကြိုးပမ်းသည့်အခါ အများက အိုင်တီနည်းပညာအပေါ် မျှော်လင့်လာကြပြီး မိုဘိုင်းဖုန်းသည်လည်း ပညာရေးအတွက် အရေးပါလာလိမ့်မည်ဟု ယူဆကြသည်။ အာရှတိုက်တွင် ဖိလစ်ပိုင်၊ မွန်ဂိုလီးယား၊ ထိုင်း၊ အိန္ဒိယနှင့် ဘင်္ဂလားဒေ့ရ်ှနိုင်ငံတို့တွင် မိုဘိုင်းဖုန်းအသုံးပြုသည့် သင်ကြားရေးစနစ်များကို အသုံးပြုကြည့်ရာ ပညာရေးဆိုင်ရာရလဒ်များ တိုးတက်လာသည်ဟု ဆိုသည်။

သို့သော် မိုဘိုင်းဖုန်း တစ်ရက်လျှင် လေးနာရီကျော်သုံးစွဲသည့် ကလေးများသည် တစ်ရက် မိနစ် ၃ဝ သာသုံးစွဲရန် ကန့်သတ်ခံထားရသည့် ကလေးများထက် ကျောင်းသင်ခန်းစာစမ်းသပ်မှုများတွင် ရလဒ်သိသိသာသာ ညံ့ဖျင်းကြောင်း ဂျပန်အစိုးရ၏ မကြာသေးမီက လေ့လာမှုတစ်ရပ်တွင် တွေ့ရှိခဲ့သည်။ တစ်ရက်လျှင် မိုဘိုင်းကိရိယာများကို လေးနာရီထက်မနည်းသုံးစွဲသည့် အသက် ၁၄ နှစ်နှင့် ၁၅ နှစ်အရွယ် ကျောင်းသားကိုးဦးတွင် တစ်ဦးသည် ကျောင်းပညာ၌ ဘာသာစုံ ပျမ်းမျှအမှတ် ၁၄ ရာခိုင်နှုန်း ကွာဟခဲ့ကြောင်း လေ့လာမှုက ဆိုသည်။ သင်္ချာတွင် ၁၈ ရာခိုင်နှုန်းကျော် ကွာဟကြောင်း ဂျပန်ပညာရေးဝန်ကြီးဌာနက လေ့လာခဲ့သောစစ်တမ်းတွင် တွေ့ရှိခဲ့သည်။

စစ်တမ်းတွင်ပါဝင်ခဲ့သော အထက်တန်းကျောင်းသားများ၏ ထက်ဝက်နီးပါးသည် တစ်ရက်လျှင် တစ်နာရီကျော် မိုဘိုင်းဖုန်းသုံးစွဲကြကြောင်း ဖြေဆိုခဲ့ကြသည်။ စစ်တမ်းတွင် ပါဝင်သည့် ကျောင်းသားများအနက် လေးပုံတစ်ပုံတွင် မိုဘိုင်းဖုန်းမရှိကြပေ။ စမတ်ဖုန်းသုံးစွဲမှုသည် ၁၁ နှစ်အရွယ်ကျောင်းသားများတွင် ပျံ့နှံ့နေကြောင်း၊ မူလတန်းနောက်ဆုံးနှစ်ကျောင်းသားများ၏ ၅၄ ရာခိုင်နှုန်းသည် ကိုယ်ပိုင်ဖုန်းရှိကြကြောင်း ယင်းစစ်တမ်းက တွေ့ရှိခဲ့သည်။ ၎င်းတို့အနက် ၁၅ ရာခိုင်နှုန်းသည် နေ့စဉ် ဖုန်းတစ်နာရီ ထက်မနည်း သုံးစွဲကြကြောင်း ယင်းစစ်တမ်းက တွေ့ရှိခဲ့သည်။ ပညာရေးဝန်ကြီးဌာနက ကောက်ယူသည့် ကျောင်းသားများ မိုဘိုင်းဖုန်းသုံးစွဲမှုဆိုင်ရာ စစ်တမ်းကကျောင်းသားများဖုန်းကို စွဲလမ်းမှုကြောင့် သင်ခန်းစာ စာအုပ်များကို မျက်ကွယ်ပြုလာနေသည်ကို စိုးရိမ်မှု မြင့်တက်စေခဲ့သည်။ ကျောင်းသားများ မိုဘိုင်းဖုန်းသုံးစွဲမှုအလေ့အထကို လေ့လာခဲ့သော ကာဇူအိုတာကီအူချီက မိုဘိုင်းဖုန်းသုံးစွဲမှုကို စွဲလမ်းသောကျောင်းသားများသည် ပညာရပ်ဆိုင်ရာ စွမ်းရည်တွင် ယုံကြည်မှုမရှိကြောင်း ပြောကြားခဲ့ပြီး ဖုန်းသုံးစွဲမှုကို ကန့်သတ်ရန် မိဘများအား တိုက်တွန်းခဲ့သည်။

ဂျပန်သည် ဖွံ့ဖြိုးပြီးနိုင်ငံဖြစ်သောကြောင့် ကလေးများ၏ မိုဘိုင်းဖုန်းသုံးစွဲမှုနှင့် ပညာရေးဆက်နွှယ်မှုမှာ ဖွံ့ဖြိုးဆဲနိုင်ငံများနှင့် ကွာခြားနိုင်သည်ဟု ယူဆနိုင်သော်လည်း အကျိုးရှိသောကိစ္စများအတွက်သုံးစွဲခြင်းနှင့် အကျိုးမရှိရုံမက အကျိုးပါယုတ်စေသောကိစ္စများအတွက် သုံးစွဲခြင်းတို့အကြား ချင့်ချိန်စဉ်းစားရန်လိုသည်။ ၎င်းအပြင် အထိုက်အလျောက်သုံးစွဲခြင်းနှင့် အလွန်အကျွံ စွဲလမ်းစွာ သုံးစွဲခြင်းတို့အကြားလည်း များစွာကွာခြားသည်။ ထို့ကြောင့် မိဘများအနေဖြင့် စဉ်းစားချင့်ချိန်မှု အားနည်းသေးသော ကလေးများ၏ မိုဘိုင်းဖုန်းသုံးစွဲမှုနှင့်ပတ်သက်၍ ထိန်းညှိပေးရန်လိုအပ်မည် ဖြစ်ပါသည်။

The Daily Eleven Newspaper

ကလေး လုပ်သားတွေကို စာသင်ခန်း ပြန်ပို့ပါ

တယ်လီနောကုမ္ပဏီက နိုင်ငံတွင်း ကွန်ရက်တည်ဆောက်မှု လုပ်ငန်းခွင် ၃ ခုမှာ ကလေး လုပ်အားအသုံးပြုတာ တွေ့ခဲ့ရတယ်လို့ ထုတ်ဖော်ပြောဆိုလာခဲ့ပါတယ်။ တယ်လီနောကုမ္ပဏီက တာဝါတိုင်တွေ စိုက်ရာမှာ သူနဲ့ တွဲဖက်လုပ်တဲ့ မြန်မာကုမ္ပဏီတွေအနေနဲ့ အသက် ၁၅ နှစ် အောက် ကလေးတွေကို အလုပ်မခိုင်းစေဖို့ မေတ္တာရပ်ခံ ထားပေမယ့် အခု လို ကလေးလုပ်သားအသုံးပြုမှု ရှိတာကို တွေ့ခဲ့ရတာလို့ ဆိုတယ်။ အဲဒီသတင်းဖတ်မိတော့ မြန်မာပြည်အလည်ရောက်ခဲ့တုန်းက တွေ့မြင်မိတဲ့ ကလေးအလုပ်သမားတွေကို ပြန်သတိရမိတယ်။

အမိမြေနဲ့ ၂၅ နှစ်တာဝေးကွာနေရသူ ကျောင်းသားဟောင်းအတော်များများ ရန်ကုန်မြို့ဆီပြန်ရောက်တဲ့အခါ ပထမဆုံးသွားတဲ့နေရာက ရွှေတိဂုံစေတီဖြစ်ပြီး ဒုတိယ နေရာကတော့ အင်းယားကန်စောင်းပဲ ဖြစ်ပါတယ်။ အဲဒီ အင်းယားကန်စောင်းက စားသောက်ဆိုင်တန်းမှာ ကလေးစားပွဲထိုးတွေ တွေ့ရတော့ ပြည်ပမှာ လူ့အခွင့်အရေးနဲ့ ကြီးပြင်းခဲ့ရသူတွေအတွက် အကြီးအကျယ် အံ့အားသင့် ကြေကွဲတုန်လှုပ်မိတယ်။ အတော်များများဟာ အသက် ၁၈ နှစ်မပြည့်သေးတဲ့ လူငယ်တွေပါ။ ”အသက် ဘယ်လောက်ရှိပြီလဲ၊ ကျောင်းမနေကြဘူးလား” ဆိုပြီး မေးကြည့်တော့ သူတို့က သိပ်ဖြေချင်ပုံမရပါ။

တရက်မှာတော့ တာမွေအ၀ိုင်းအနီးက နာမည်ကြီးလက်ဖက်ရည်ဆိုင်မှာ သွားထိုင်ရင်းနဲ့ စားပွဲထိုး လူငယ်တွေနဲ့ စကားပြောဖြစ်ပါတယ်။ အသက် ၁၈ နှစ်မပြည့်သေးတဲ့ လူငယ်စားပွဲထိုးချည်း ၁၀ ယောက်လောက် ရှိမယ် ထင်ပါတယ်။ သူတို့ဟာ အညာဒေသကဖြစ်ပြီး ဒီဆိုင်မှာ အလုပ်ရဖို့အရေး အတော်ကြိုးစားခဲ့ရတယ်လို့ ဆိုပါတယ်။ ကျောင်းမနေကြဘူးလားဆိုပြီးမေးတော့ မူလတန်းတော့ အောင်ပြီးပြီ၊ အလယ်တန်းတော့ တ၀က်တပျက်နဲ့ ထွက်လာရတယ်လို့ တဦးကပြောပါတယ်။ ဒါပေမယ့် ဒီလူငယ်လေးရဲ့ သချာင်္စွမ်းရည်ကတော့ လက်ဖျားခါလောက် ပါတယ်။

ဘာကြောင့်လဲဆိုရင် ရန်ကုန်က လဖက်ရည်ဆိုင်နဲ့ စားသောက်ဆိုင်အတော်များများမှာ စားပွဲနံပတ် တွေ၊ bill နံပတ်တွေ၊ bill တွေရေးလေ့မရှိပါ။ လက်ဖက်ရည်တခွက်က ဘယ်လောက်၊ မုန့်တခုက ဘယ်မျှ၊ ကြက်သားဟင်း တခွက်က ဘယ်ပုံ၊ ဆေးလိပ်တဗူးက ဘယ်ရွေ့  စသဖြင့် တခါတည်း စားပွဲ ထိုးပါးစပ်ကနေ တန်းပြောပြိး ပေါင်းသွားလိုက်တာများ ဂဏန်းပေါင်းစက်ရှိမှ အလုပ်လုပ်တတ်တဲ့ အ နောက်တိုင်းသားတွေ အလေးပြုလောက် ပါတယ်။

ဒါက ရန်ကုန်မှာတွေ့ရတဲ့ ကျောင်းဆက်တက်ခွင့်မရတဲ့ ၁၈ နှစ်အောက် လူငယ်အလုပ်သမားလေး တွေရဲ့ အခြေနေပါ။ ပုဂံနဲ့ အင်းလေးဖက်မှာတွေ့ရတဲ့ လူငယ်အလုပ်သမားတွေကျတော့ ရန်ကုန်နဲ့ မတူ ပြန်ဘူး။ ဘာဖြစ်ဖြစ် ရန်ကုန်က စားသောက်ဆိုင်တွေမှာ စားပွဲထိုးလုပ်တာဟာ တရားဝင်လုပ်သား တပိုင်းဖြစ်တဲ့အတွက် သူတို့မှာ လစာရပါတယ်။

ဒါပေမယ့် ဒီ ပုဂံက ရွှေစည်းခုံစေတီ ဘေးမှာတွေ့ရတဲ့ အပျော်တန်းဧည့်လမ်းညွှန် ကလေးငယ်တွေက တော့ လစာ ရှိပုံမရ။ တရားဝင် လမ်းညွှန်တွေဖြစ်လာအောင်လဲ ဘယ်သူကမှ မြေတောင်မြောက်ပေး မဲ့ ပုံမရှိပါ။ ထူးခြားတာ ကတော့ ရန်ကုန်စားသောက်ဆိုင်တန်းက ကလေးစားပွဲထိုးတွေ သချာင်္တွက် ကျွမ်းသလို ပုဂံကဧည့်လမ်းညွှန် ကလေးတွေကလည်း အင်္ဂလိပ်စကားပြော ကျွမ်းပါတယ်။ ဘုရားရာဇ၀င် တခုလုံးကို အာဂုံဆောင်ထားနိုင်တာပါ။ တချို့ကလေးတွေဆိုရင် အင်္ဂလိပ်လိုအပြင် ပြင်သစ်၊ ဂျပန်၊ ထိုင်းဘာသာတွေတောင် အတော်အတန် ပြောတတ် နေတာကိုတွေ့မိတော့ မချီးကျုးပဲ မနေနိုင်ပါ။

ခက်တာက ဒီကလေးတွေ ဒီလောက်တော်နေပေမယ့် သူတို့ကို ဘယ်သူကမှ အသိမှတ်ပြုထားတာ မရှိ။ ဧည့်သည်တဦးအတွက် လမ်းညွှန်မှုပေးရင် ဘယ်လောက်ပေးရမယ်ဆိုတဲ့ အခကြေးငွေ သတ်မှတ်ချက်လည်း မရှိပါ။ စေတနာရှိသလောက်သာ ပေးထားခဲ့ပေတော့။ ”နှစ်ထောင်လောက်တော့ ပေးပါ ဦးရယ်။ ဒီက ရတဲ့ငွေနဲ့ မိဘနှစ်ပါးကိုလုပ်ကျွေးနေရတာပါ” လို့ဆိုတော့ ကျနော့်စိတ်ထဲ အတော်မကောင်း ဖြစ်သွားပါတယ်။ ဒါပေမယ့် သူ့လိုတောင်းနေသူတွေက တဒါဇင်မကရှိတယ်။

ပုဂံပြိးရင် ကမ္ဘာလှည့်ခရီးသည် ဒုတိယ အများဆုံးသွားတဲ့နေရာလို့ နာမည်ကြီးနေတဲ့ အင်းလေးကန်ဖက် ရောက်တော့လည်း အခြေနေက နောက်တမျိုး။ ဒီကလေးတွေက ပုဂံဖက်မှာလို ဧည့်လမ်းညွှန်မလုပ်ပဲ ပန်း ရောင်းကြပါတယ်။ ဖောင်တော်ဦးစေတီဘေးမှာ တွေ့ရတဲ့ ကလေးတွေဆီက ထူးထူးခြားခြား ပညာရေးနဲ့ဆိုင်တဲ့ တောင်းဆိုသံတခုကိုကြားရတော့ အတော်အံသြသွားပါတယ်။

”ဦးလေး၊ ဦးလေးက ပန်းမ၀ယ်ရင်လည်း သမီးကျောင်းစာအုပ်ဖိုးအတွက် တထောင်လောက် ပေးခဲ့လေ” လို့ ပန်းသည်ကလေးမတဦးက ပြောပါတယ်။ ဧည့်သည်က ၀ယ်ချင်မှန်းမသိ၊ မ၀ယ်ချင်မှန်းမသိ လမ်းပိတ်ပြီး နင်းကန်ရောင်းနေလို့ စိတ်ညစ်ပြီး ထွက်ပြေးလာတဲ့ ကျနော် တွေဝေသွားပါတယ်။ လှူလိုက်ရင် ကောင်းမလားပေါ့။ ဒါပေမယ့် စိတ်ထဲမှာတော့ ဒါတွေဟာ အစိုးရက ဖြေရှင်းပေးရမယ့် ကိစ္စပဲ။ ၂ ထောင်ပေးလိုက်ရုံနဲ့ ပြေလည်သွားမယ့်ကိစ္စမှ မဟုတ်ပဲ။ ပြီးတော့ သူ့ကို နှစ်ထောင်ပေးရင် ကျန်တဲ့လူတွေလည်း နှစ်ထောင်စီ ကျနော် ထပ်ပေးသင့်သလား။

အဲဒီလို ရန်ကုန်စားသောက်ဆိုင်တန်းကနေ ပုဂံ-အင်းလေး ဘုရားစောင်းတန်းက ပန်းသည် လေးတွေအထိ ပုံစံအမျိုးမျိုးနဲ့ ဘ၀ကို ရုန်းကန်နေရရှာတဲ့ အသက် ၁၈ နှစ်မပြည့်သေးပဲ လုပ်ငန်းခွင်ထဲ ၀င်နေရသူတွေ ဘယ်လောက်များများရှိနေလေမလဲ။ ဘယ်သူကမှ စာရင်းဇယားလုပ်မထားတော့ အတိအကျ မသိနိုင်ပါ။ ဒါပေမယ့် တနိုင်ငံလုံးရှိ လဖက်ရည်ဆိုင်တွေ၊ စေတီပုထိုးတွေ၊ မီးရထားဘူတာရုံ တွေ၊ အဝေးပြေးကားဂိတ်တွေမှာ အလုပ်လုပ်နေရတဲ့ ကလေးတွေကို ပေါင်းလိုက်ရင် အရေအတွက် သိန်းချီရှိမယ်လို့ ခန့်မှန်းနိုင်ပါတယ်။

သူတို့အတွက် ဘာလုပ်ပေးနိုင်သလဲ။ ဘယ်လိုလုပ်ပေးနိုင်သလဲ။ အင်း… ဒီ မေးခွန်းကို မေးရတာကလဲ ခပ်လန့်လန့်။ ဘာကြောင့်လဲဆိုရင် ”ဒီကလေးတွေ ဒီလိုပဲ တသက်လုံးနေ လာတာ အဆန်းလုပ်လို့၊ မင်းက နိုင်ငံခြားကနေပြန်လာမှ ကိန်းကြီးခန်းကြီးနဲ့ လျှောက်ပြောနေတယ်” ဆိုပြီး အပြောခံရလေ့ရှိလို့ဖြစ်ပါတယ်။

သတိမမူ ဂူ မမြင်ဆိုတဲ့အတိုင်း အမှားအယွင်းကြားမှာ နေ့စဉ်နေထိုင်ရှင်သန်နေသူတွေအဖို့ ဒီဟာကို အမှားအယွင်းတခုအဖြစ် မြင်ချင်မှမြင်မိပါလိမ့်မယ်။ ဒါဟာ သူမွေးလာကတည်းက နေ့စဉ်မြင်နေရတဲ့ မြင်ကွင်းဖြစ်တဲ့အတွက် ဒါကို အမှားအယွင်းတခု၊ အားနည်းချက်တခု၊ ပြုပြင်ဖို့ လိုနေတဲ့အချက်တခုအ ဖြစ် မြင်မိဖို့မလွယ်ပါ။ ဒါပေမယ့် ကလေးသူငယ် အခွင့်အရေးတွေကို အလေးထားတဲ့နိုင်ငံက လာတဲ့သူတွေက တော့ ဒါဟာ စနစ်တခုရဲ့ မှားယွင်းချက်၊ အားနည်းချက်အဖြစ် ချက်ချင်းမြင်လေ့ရှိပါတယ်။

ဒီလိုကျောင်းနေခွင့်မရတဲ့ ကလေးငယ်တွေအတွက် ရန်ကုန် NGO တခုက ရွှေ့ပြောင်းကျောင်းတခုကို ထူ ထောင်ပြီး ကလေးစားပွဲထိုးတွေကို သူတို့ဆိုင်တွေအထိသွားပြီး စာသင်ပေးတယ်လို့ သတင်းကြားရပါတယ်။ ဒါဟာ ကောင်းမွန်တဲ့အစီစဉ်ဖြစ်ပေမယ့် အမြစ်ပြတ် ကုထုံး မဟုတ်ပါ။

ဒါဖြင့် အမြစ်ပြတ်ကုထုံးက ဘာလဲ။ အစိုးရဖက်ကနေ ကလေးလုပ်သားမခိုင်းဘူးဆိုတဲ့ နိုင်ငံတကာ စာချုပ်စာတန်း တွေကိုလက်မှတ်ထိုးပြီး ဒီကလေးတွေ ကျောင်းနေနိုင်အောင် အမျိုးသားစီမံကိန်းချကာ လုပ်ဆောင်ဖို့လိုနေပါတယ်။ ပြီးခဲ့တဲ့ ၂၀၁၃ ခုနှစ်နှောင်းပိုင်းက ထွက်ပေါ်လာတဲ့သတင်းတွေ အရဆို ရင်တော့ ILO  ပြဋ္ဌာန်းချက် ၁၈၂ ကို မြန်မာအစိုးရဖက်က လက်မှတ်ထိုးလိုက်ပေမယ့် အနည်းဆုံး အသက်သတ်မှတ်ချက်ဆိုင်ရာ ILO ပြဋ္ဌာန်းချက် ၁၃၈ ကိုတော့ လက်မှတ်ရေးထိုးထားခြင်းမရှိသေးပါဘူး။

အဲဒီလို လက်မှတ်ရေးထိုးထားတယ်ဆိုတာကို အလုပ်ရှင်တွေ၊ ကလေးတွေနဲ့ ကလေးမိဘတွေ သိရှိကြပါရဲ့လား။

လွန်ခဲ့တဲ့ ၁၀ နှစ်ကျော်က ကြုံဖူးတဲ့ ထိုင်းနိုင်ငံ မဟာချိုင်ဒေသက မြန်မာကလေးလုပ်သားတွေ ကယ်တင်ရေးစီမံကိန်းတခုကို သွားသတိရမိပါတယ်။ အသက် မပြည့်သေးတဲ့ ကလေးတွေကို မဟာချိုင် ပုဇွန်စက်ရုံမှာခိုင်းစေနေတယ်ဆိုပြီး သတင်းရတဲ့အတွက် NGO တခုနဲ့အတူ ကျနော် သတင်းယူဖို့ လိုက်သွား ပါတယ်။ ကျနော်တို့ကိုမြင်တော့ ထိုင်းအလုပ်ရှင်က မကြိုက်ပါ။ အလုပ်ရုံထဲ ၀င်ကြည့်လို့ရတယ်။ ဓာတ်ပုံရိုက်ခွင့်၊ မေးမြန်းခွင့်တော့ မပေးနိုင်ဘူးလို့ပြောပါတယ်။ ၀င်ကြည့်တော့ အသက် ၁၄-၁၅ ၀န်းကျင် လူ ငယ်တွေအများကြီး။

အဲဒါတွေကို ကျနော်တို့က သတင်းပြန်လုပ်တော့ အလုပ်ရှင်ဖက်က စိတ်ဆိုးတဲ့အပြင် အလုပ်သမားတွေကပါ စိတ်ဆိုးတာခံရတော့ ကျနော် အတော်အံ့သြသွားပါတယ်။ ”ဒီကလေးတွေက ဒီမှာအလုပ် မလုပ်ရင် ဘယ်မှာ သွားလုပ်ရမလဲ။ ခင်ဗျားတို့ ထမင်းကျွေးထားမှာလား” လို့ ကလေးမိဘ အလုပ်သမားတွေက ပြန်ပြောပါတယ်။

ဆိုလိုတာကတော့ ဥပေဒအတိုင်း သွားလုပ်ရုံနဲ့မပြီး။ ဒီကလေးတွေကို အလုပ်ခွင်ထဲကနေ ပြန်ထုတ်ချင်တယ်ဆိုရင် သူတို့ကို ကျောင်းထားပေးနိုင်ဖိှု့၊ အနည်းဆုံးအားဖြင့် သူတို့ရဲ့ စားဝတ်နေရေးကို တာဝန်ယူနိုင်ဖို့ လိုပါတယ်။ ဘာမှ တာဝန်မယူနိုင်ပဲနဲ့ ”မင်းအသက်မပြည့်သေးလို့ အလုပ်ခွင်ထဲ မ၀င်ပါနဲ့” ဆိုပြီး ဥပဒေတခုတည်းနဲ့ သွားတားရင် ထမင်းမငတ်အောင် ရှာစားနေသူရဲ့ ထမင်းလုတ်ကို ပုတ်ချတာနဲ့ တူပါမယ်။  ဒီအတွက် အစိုးရမှာ ဘယ်လို စီမံကိန်းရှိသလဲ။ NGO တွေနဲ့ မလုံလောက်ပါ။

အင်းယားကန်ဘေး စားသောက်ဆိုင်က စားပွဲထိုးကလေးတွေ၊ ပုဂံရွှေစည်းခုံစေတီနဲ့ အင်းလေး ဖေါင် တော်ဦး စေတီက ကလေးဧည့်လမ်းညွှန်တွေ၊ ကလေးပန်းသည်လေးတွေ ကျောင်းစာသင်ခန်းထဲ ပြန်ရောက်နိုင်ဖို့အတွက် ကျနော်တို့ ၀ိုင်းအဖြေရှာဖို့ ဖြေရှင်းဖို့ အမြန်လိုနေပြီဖြစ်ပါတယ်။

ထက်အောင်ကျော် (ဧရာဝတီ Blog)

လူငယ်နှင့် စိတ်ခေါ်မှုများ

ကမ္ဘာပေါ်ရှိ လူငယ်များ၏ ၂၀ ရာခိုင်နှုန်းသည် တစ်နည်းနည်းသော စိတ်ပိုင်းဆိုင်ရာ ပြဿနာများကို ရင်ဆိုင်နေရသည် ဟု ကုလသမဂ္ဂအဖွဲ့ က ထုတ်ပြန်ခဲ့သည့် လူငယ်တို့၏ စိတ်ကျန်းမာရေးအခြေအနေနှင့် လူ မှုပတ်ဝန်းကျင်တွင် ပါဝင်မှုဆိုသည့် ထုတ်ပြန်ချက်တွင် ဆိုထားသည်။

“စိတ်ကျန်းမာရေးလို့ ပြောလိုက် ရင် စိတ်မမှန်တဲ့သူတွေပဲလား စိတ် ရောဂါဝေဒနာ ခံစားနေရတဲ့သူတွေ ပဲလားပေါ့။ အဲ့လိုတော့ မဟုတ်ပါ ဘူး။ ဒီထက်ပိုပြီး ကျယ်ပြန့်ပါတယ်။ စိတ်အားငယ်တာ၊ စိုးရိမ်ကြောင့်ကြ မှုတွေဖြစ်ကြတာ။ စိတ်ဓာတ်ကျဆင်း တာ၊ စိတ်မခိုင်လုံတာမျိုးတွေ အကုန် လုံးပါပါတယ်”ဟု မြန်မာနိုင်ငံ ဆရာ ၀န်အသင်း(ဗဟို) ဥက္ကဋ္ဌ ပါမောက္ခ ဦးရဲမြင့်ကဆိုသည်။

ယေဘုယျအားဖြင့် လူငယ်ဆို သည်မှာ အသက်ဆယ့်ငါးနှစ်နှင့် နှစ် ဆယ့်လေးနှစ် အသက်အရွယ် ရှိသူ များကို ဆိုလိုသည်ဟု ၎င်းင်းကဆိုသည်။ တစ်ကမ္ဘာလုံး လူဦးရေဖြင့်ကြည့်မည် ဆိုပါက ကမ္ဘာ့လူငယ်ဦးရေမှာ ၇ ဘီလီယံ ရှိနေပြီး မြန်မာနိုင်ငံအနေဖြင့် လူဦးရေ၏ ၁၈ရာခိုင်နှုန်းခန့်ရှိသည် ဟုဦးရဲမြင့်ကဆိုသည်။ ကမ္ဘာ့ကုလ သမဂ္ဂအဖွဲ့ကြီး၏ ထုတ်ပြန်ချက်အရ ကမ္ဘာလူဦးရေ၏ ငါးပုံတစ်ပုံသည် လူငယ်ထုဖြစ်ကြောင်း သိရသည်။

“ဒီအရွယ်ဟာ ခန္ဓာကိုယ်ပိုင်းအ ရရော စိတ်ပိုင်းဆိုင်ရာအရပါ ပြောင်းလဲတဲ့ အချိန်ဖြစ်တဲ့ အတွက်ကြောင့် ဒီအချိန်မှာ စိတ်ခံစားမှုရှုထောင့်၊ မိမိ ကိုယ်ကို ဂရုစိုက်မှုရှုထောင့်၊ ရုပ်ပိုင်း ဆိုင်ရာ ပြောင်းလဲမှုရှုထောင့်ဆို ပြီး ပတ်ဝန်းကျင် အလိုက် ပြောင်းလဲ တာရှိသလို ကိုယ့်ရဲ့မျိုးဆက်အလိုက် ပုံစံပြောင်းလဲတာလည်းရှိပါတယ်။ လူငယ်တွေ စိတ်ပိုင်း ဆိုင်ရာ ပြဿနာ တွေ ရင်ဆိုင်ရတာဟာ ကောင်းတဲ့ ဟာတော့ မဟုတ်ပါဘူး။ ဒါပေမဲ့ လွဲ ရှောင်လို့ မရတဲ့အရာလည်း မဟုတ်ပါဘူး”ဟု ကမ္ဘာ့လူဦးရေ ရန်ပုံငွေအဖွဲ့ ဌာန ကိုယ်စားလှယ် မစ္စ ဂျန်နက်ဂျက်ခ် ဆန်က ကမ္ဘာ့လူငယ်နေ့ အခမ်းအနား တွင် ပြောကြားခဲ့သည်။

လူငယ်များအနေဖြင့် ပြောင်းလွှဲ မှုများစွာ ကြုံတွေ့နေရချိန်တွင် လေ့ လာသင်ယူမှု လုပ်ငန်းဆောင်တာ တွေ လုပ်ဆောင်နေရသကဲ့သို့ အ ခြားတစ်ဖက်တွင်လည်း ပြောင်းလဲမှု များနှင့်အတူ လိုက်ပါဆောင်ရွက်နိုင်ရန် အဆင်သင့်မဖြစ်သေးဘဲ အခက် အခဲတွေရှိနိုင်သည် ဟု သူမကဆိုသည်။

“အရွယ်ရောက်စအချိန်ဆိုတာ အကန့်အသတ်နယ်နိမိတ်တွေကို စပြီးတော့ စမ်းသပ်တဲ့ အရွယ်လို့ ပြော လို့ရတယ်။ ပြီးလွတ်လပ်မှုကို ပိုပြီး တော့ စမ်းသပ်ချင်တဲ့ အရွယ် လည်း ဖြစ်ပါတယ်။ ဖြစ်ပေါ်လာမယ့် ဆိုးကျိုးဆိုးပြစ် ဆိုတဲ့ ဟာကို လှမ်းမကြည့်ဘဲနဲ့ စိန်ခေါ်မှုတွေ ကို ရင်ဆိုင်တွေ့ ဖို့ ကြိုးစားတဲ့အရွယ်လည်းဖြစ်ပါတယ်။ အနာဂတ်အတွက် မျှော်လင့် ချက်တွေ အရမ်းကိုမြင့်မားတတ်တဲ့ အရွယ်လည်းဖြစ်ပါတယ်။ အကုန်လုံး ကို ပြန်ချုံ့ပြီးပြောမယ်ဆိုရင် ဒီအရွယ် ဟာ လုပ်နိုင်တာထက် မလုပ်နိုင်တာ ပိုများတဲ့အရွယ်လို့ ပြောလို့ရပါတယ်”ဟု မစ္စဂျန်နက်ဂျက်ခ်ဆန် ကဆိုသည်။

မြန်မာနိုင်ငံမှာ လူငယ်ဖြစ်ရခြင်းသည် အခြားနိုင်ငံတွင် လူငယ်တစ် ယောက်ဖြစ်ရခြင်းထက် စိန်ခေါ်မှု များသည်ဟု ထင်မြင်ကြောင်း ရန် ကုန်လူငယ်ကွန်ရက် လူငယ်ကိုယ် စားလှယ်၊ မသဉ္စာရွှန်းလဲ့ရည်က ဆို သည်။ လူငယ်များ ရင်ဆိုင်နေရသည့် ပြဿနာများတွင် အလုပ်လက်မဲ့ ပြဿနာမှာလည်း အရေးပါသည့် အကြောင်းအရာတစ်ခုဟု မြန်မာလူ ငယ်များက ဆိုသည်။ လူငယ်ထုကြား အလုပ်အကိုင်အခွင့်အလမ်း ရှားပါးမှု ဆိုင်ရာ ကိစ္စရပ်များအပါအ၀င် တိုင်း ရင်းသားဒေသများနှင့် ဖွံ့ဖြိုးမှုနည်း ပါးသည့်ဒေသများမှ လူငယ်များကို အသိပညာပေးရေးဆိုင်ရာ ကိစ္စရပ် များ လွှတ်တော်တွင် တင်ပြဆွေးနွေး နိုင်ရန်အတွက်လည်း လွှတ်တော် ကိုယ်စားလှယ်တွေထံ မြန်မာနိုင်ငံ လူငယ်များ အစည်းအရုံးက တာဝန် ရှိသူတွေက နေပြည်တော်မှာ သွား ရောက်တွေ့ဆုံမှုများရှိခဲ့သည်။
လူငယ်များ အလုပ်အကိုင်ရှား ပါးမှုသည် မြန်မာတစ်နိုင်ငံတည်း တွင်သာမကဘဲ နိုင်ငံတကာတွင်လည်း ရင်ဆိုင်နေ ရသည့် ပြဿနာတစ်ခု ဖြစ်သည်ဟုပညာရှင်များကဆိုသည်။

အပြည်ပြည်ဆိုင်ရာ အလုပ် သမားအဖွဲ့၏ ထုတ်ပြန်ချက်အရ ယ ခုနှစ်အတွင်း အသက် ၁၅ နှစ်မှ ၂၄ နှစ်ကြား လူငယ်လူရွယ် ၇၅ သန်း ခန့်မှာ အလုပ်လက်မဲ့ဖြစ်နေကြပြီး ၎င်းင်းအရေအတွက်မှာ ကမ္ဘာ့လူဦးရေ၏ ၁၂ .၇ ရာခိုင်နှုန်းခန့်ရှိနေကြောင်း သိရသည်။ ၂၀၁၁ ခုနှစ်အတွင်း လူ ငယ်လူရွယ်အလုပ်လက်မဲ့ဖြစ်မှုနှုန်း မှာ ကမ္ဘာ့ လူဦးရေ၏ ၁၂ .၆ ရာခိုင် နှုန်းရှိပြီး တစ်နှစ်ထက်တစ်နှစ် အ လုပ်လက်မဲ့နှုန်း မြင့်မားလာခြင်းအ ပေါ် သတိထား ကိုင်တွယ်ကြရန် ILO က သတိပေးထားသည်။ ကမ္ဘာ့ငွေ ကြေးအခက်အခဲဖြစ်ပွားခဲ့သော ၂၀၀၉ ခုနှစ်၌ လူငယ် လူရွယ် ၇၅ .၄ သန်း ခန့် အလုပ်လက်မဲ့ဖြစ်ခဲ့ရပြီး ယခု လက်ရှိကိန်းဂဏန်းများအရဆို လျှင် ၂၀၁၆ အရောက်တွင် အလုပ် လက်မဲ့နှုန်း များပြားလွန်းနေနိုင်ပြီး ကမ္ဘာ့ စီးပွားရေးအကျပ်အတည်းများ ပေါ်ပေါက်လာနိုင်သည်ဟု ပညာရှင် များက သုံးသပ်ထားသည်။

လူငယ်များတွင် စိတ်ပိုင်းဆိုင်ရာ ပြဿနာကို အသက် ၁၄ နှစ်မတိုင် ခင် ဖြစ်ပွားမှုမှာ တစ်ဝက်နီးပါးခန့်ရှိ ပြီး ၇၅ ရာခိုင်နှုန်းခန့်မှာ အသက် ၂၄ နှစ်မတိုင်ခင်တွင် ဖြစ်တတ်သည် ဟုလည်း ရန်ကုန်တက္ကသိုလ်၊ စိတ် ပညာဌာန၊ ပါမောက္ခဌာနမှူး ဒေါ်နီ လာကြူက ဆိုသည်။ “ကိန်းဂဏန်း တွေကိုကြည့်ရင် ကမ္ဘာပေါ်မှာ တစ် နှစ်ကို ၇၁,၀၀၀လောက်က ကိုယ့် ကိုယ်ကိုယ် သတ်သေကြတယ်။အဲဒီ့ ထက်အဆလေးဆယ်လောက်က ကိုယ့် ကိုယ်ကုယ် သတ်သေဖို့ ကြိုးစားခဲ့ တယ်”ဟု ရန်ကုန်တက္ကသိုလ်၊ စိတ် ပညာဌာန၊ ပါမောက္ခဌာနမှူး ဒေါ်နီ လာကြူက ဆိုသည်။
လူငယ်များ၏ စိတ်ပိုင်းဆိုင်ရာ ပြဿနာများ ခံစားရမှုတွင် ကလေး ဘ၀တွင် အနိုင်ကျင့်ခံရခြင်းသည် လည်း အစိတ်အပိုင်းတစ်ခုအဖြစ် ပါဝင်သည်ဟု ဆိုသည်။ ထိုသို့ အ နိုင်ကျင့်ရာတွင် မိဘကလည်း ဖြစ် နိုင်သကဲ့သို့ ပတ်ဝန်းကျင်မှာလည်း ဖြစ်နိုင်သည်ဟု သူမကပြောသည်။ ပဋိပက္ခများရှိနေသည့် နေရာများ တွင်နေသည့် ကလေးများသည်လည်း စိတ်ပိုင်းဆိုင်ရာခံစားရဖို့ ပိုများသည် ဟုဆိုသည်။ စိတ်ပိုင်းဆိုင်ရာ ခံစား မှုဖြစ်ပြီဆိုပါက နောက်ဆက်တွဲပြဿ နာတွေက အများကြီးလိုက်တတ်ပြီး ကြီးပြင်းလာပါကလည်း ပုံစံအမျိုးမျိုး သော မသန်စွမ်းမှုရှိသည့် ကလေး များ ဖြစ်သွားတတ်ကြသည်ဟု သူမ ကဆိုသည်။

“လူငယ်လို့ဖြစ်လာရင်ကိုယ်လုပ် ချင်တဲ့ဟာ ကိုယ်ပိုင်ဆုံးဖြတ်ချက်ရှိ ရမယ်ပေါ့နော်။ မိဘတွေဘက်ကကျ တော့လည်း ကျွန်မတို့က မရင့်ကျက် သေးဘူး။ သူတို့ရဲ့ ထိန်းချုပ်မှုအောက် မှာပဲ ရှိနေသင့်တယ်။ ကိုယ်တိုင်ဆုံး ဖြတ်ချက်ချဖို့ဆိုတာ မဖြစ်နိုင်ဘူးပေါ့ နော်။ ကိုးတန်းဆယ်တန်းမှာ ဘာ သာရပ်ရွေးတာက အစပေါ့နော်။ ဆယ်တန်းအောင်ပြီးတဲ့အခါမှာလည်း ကျွန်မတို့ ဘ၀အတွက် အရေးကြီးတဲ့ ဆုံးဖြတ်တဲ့နေရာမှာ ကိုယ်ပိုင်ဆုံးဖြတ် ချက်မရဘဲနဲ့ ပြဿနာတွေ ရင်ဆိုင် ရတာတွေလည်း ရှိပါတယ်”ဟု လူ ငယ်ဖွံ့ဖြိုးမှုအစီအစဉ်၊ လူငယ်ကိုယ်စားလှယ် ဒေါက်တာမြတ်စန္ဒီမင်းက ဆိုသည်။

စိတ်ပိုင်းဆိုင်ရာ ပြဿနာများ တွင် မူးယစ်ဆေးဝါးသုံးစွဲခြင်း၊ လိင် ပိုင်းဆိုင်ရာ နိုးကြမှုဖြစ်လာခြင်းနှင့် ပတ်သက်သည့် စိုးရိမ်ကြောင့်ကြမှု များလည်း ရှိနေသည်ဟု ပါမောက္ခ ဦးရဲမြင့်ကဆိုသည်။ လူငယ်များ ငယ် ငယ်ရွယ်ရွယ်ဖြင့် အိမ်ထောင်ကျခြင်း၊ ကာလသားရောဂါ၊ အိပ်ခ်ျအိုင်ဗွီရော ဂါ ကူးစက်ခံရခြင်းများ အပါအ၀င်၊ စာမေးပွဲနှင့်ပတ်သက်သည့် ဖိအား များသည်လည်း ပါဝင်သည်ဟု ၎င်းင်း ကဆိုသည်။
အကြမ်းဖက်မှုပါသည့် ဂိမ်းများ၊ ဗွီဒီယိုများသည်လည်း လူငယ်များ ပေါ်တွင် လွှမ်းမိုးမှုရှိသည်ဟုလည်း ပညာရှင်များက ဆိုသည်။ အဆိုပါ ဂိမ်းများ ဗွီဒီယိုများကို ထိတွေ့နေ သည့် ကလေးငယ်များနှင့် ယော က်ျားလေးများတွင် စိတ်ပိုင်းဆိုင်ရာ ပြဿနာဖြစ်ပွားမှုများသည်ဟု ဒေါက် တာဒေါ်နီလာကြူက ဆိုသည်။ လူ တစ်ဦးအတွက် သိမှုသည် အသက် ၁၆ နှစ်လောက်တွင်မှ စတင်ဖွံ့ဖြိုး ခြင်းဖြစ်သည့်အတွက် ငယ်သည့် က လေးများကို မည်သို့သောဂိမ်းမျိုးကို ကစားသင့်သည်၊ မည်သည့်တီဗွီအစီ အစဉ်ကို ကြည့်သင့်သည်ဆိုသည်ကို မိဘများက ရွေးချယ်ပေးသင့်သည် ဟု သူမကပြောသည်။

“စိတ်ကျန်းမာရေးလို့ပြောရင် ပီပီ ပြင်ပြင် ပေါ်ပေါ်ထင်ထင်တွေ့ရတဲ့ ရောဂါမျိုးမှ မဟုတ်ဘူးလေ။ နောက် ပြီးမသိသာတဲ့ စိတ်ဖိစီးတယ်ဆိုတာ မျိုး စိတ်ကျတယ်ဆိုတာမျိုး အကုန် ပါတယ်။ မြန်မာနိုင်ငံမှာက လက်ရှိ အနေအထားအရ ဒါနဲ့ပတ်သက်ပြီး ဒေတာကောက်ထားတာ မရှိသေး ဘူး။ သန်းခေါင်စာရင်း နောက်ပိုင်း တော့ ကောက်လာနိုင်တယ်”ဟု ကု လသမဂ္ဂလူဦးရေရန်ပုံငွေအဖွဲ့မှ လက်ထောက်ဌာနေ ကိုယ်စားလှယ် ဒေါက်တာနေ၀င်းကဆိုသည်။
ကျောင်းများတွင်လည်း လူငယ် များအတွက် စိတ်ပိုင်းဆိုင်ရာ ပညာ ပေးသည့် အစီအစဉ်တွေ လုပ်သင့် သည်ဟု ၎င်းင်းကဆိုသည်။ လူငယ် များအနေဖြင့်ကျောင်းများတွင် ပညာ ရေးနှင့် တွဲ၍လုပ်ရမည့် အလုပ်တွေ ရှိနေသည်ဟုလည်း ဆိုသည်။ အချို့ သော နိုင်ငံများတွင် ဖွံ့ဖြိုးမှုနှင့်တွဲ ဖက်ပြီး သင်ကြားမှုများရှိနေသည်ဟု လည်း ဆိုသည်။ “ကျောင်းစာသင် ရင်းနဲ့ တွဲပြီးသင်ရတဲ့ ကိစ္စမျိုးလေး တွေ ဘာပဲပြောပြော စိတ်ကျန်းမာ မှုကိုတော့ အထောက်အကူပြုပါ တယ်”ဟု ၎င်းင်းကဆိုသည်။
“ကိုယ်ဘယ်သူလဲ၊ ကိုယ့်ရဲ့ဖြစ် ချင်တဲ့ ရည်မှန်းချက်က ဘာလဲ။ ကိုယ့် ရဲ့အားသာချက်တွေ ဘာရှိလဲ။ ကိုယ့် ရဲ့အားနည်းချက်တွေ ဘာရှိလဲ။ ဒါ မျိုးမြင်တတ်ရင် အခက်အခဲတွေကို ရင်ဆိုင်နိုင်သွားမယ်။

တစ်နည်းအား ဖြင့်ပြောရင် စိတ်ဓာတ်ကြံ့ခိုင်မှု လုပ် ပေးရမယ့် အတိုင်းအတာလေးတွေ လည်း ရှိတယ်။ အရေးကြီးတာက တော့ စိတ်ဓာတ်ခိုင်မာဖို့လိုတယ်”ဟု ဒေါက်တာနေ၀င်းပြောသည်။
ကျောင်းများတွင်မက မိဘတွေ ကလည်း ထိန်းသိမ်းသင့်တာ ထိန်း သိမ်း၍ လွှတ်ပေးသင့်သည်ကို လွှတ် ပေးပြီး လူငယ်များကိုယ်တိုင် စဉ်း စားတွေးခေါ်တတ်လာရန် လုပ်ပေး သင့်သည်ဟုလည်း ဆိုသည်။
မြန်မာနိုင်ငံတွင် လူငယ်ရေးရာ မူဝါဒမရှိသေးသည့်အတွက် တစ်ခါ တစ်ရံတွင်လူငယ်နှင့်ပတ်သက်သည့် အလုပ်များလုပ်ရာတွင် ညှိနှိုင်းဆောင် ရွက်ရမည့် ကိစ္စများ၊ ၀န်ကြီးဌာနတစ် ခုနှင့်တစ်ခု ချိတ်ဆက်ဆောင်ရွက်ရ မည့် ကိစ္စများ၊ အဖွဲ့အစည်းများနှင့် ပူးပေါင်းဆောင်ရွက်ရမည့် ကိစ္စများ နှင့် ပတ်သက်ပြီး အားနည်းမှုများရှိနေ သည်ဟု ဆိုသည်။

“မူဝါဒလို့ပြောရင် ကျန်းမာရေးနဲ့ ပတ်သက်တာတွေ ပညာရေးနဲ့ပတ် သက်တာတွေ အလုပ်အကိုင်အခွင့် အလမ်း ကျားမခွဲခြားမှု အဲ့လိုဟာ မျိုးတွေ အကုန်လုံးပါရမှာပေါ့။ မူဝါဒ ဆိုတော့လေ။ အခုတော့ ပြင်ဆင်တဲ့ ကာလကိုရောက်နေပြီ။ မကြာခဏ လူငယ်တွေနဲ့တွေ့တယ်။ ဖိုရမ်တွေ လုပ်တယ်။ ဆွေးနွေးပွဲတွေလုပ်တယ်။ သူတို့ဆီကနေ အချက်အလက်ယူ တာတော့ တော်တော်များများပြီးနေ ပြီ။ အခုလိုအပ်နေတာက တကယ် ရေးမယ့် ပြည်တွင်းပြည်ပပညာရှင် တွေပေါ့”ဟု ဒေါက်တာနေ၀င်းက ဆိုသည်။

ကုလသမဂ္ဂ လူဦးရေရန်ပုံငွေအ ဖွဲ့၊ယူနီဆက်၊ယူနက်စကိုနှင့် လူမှု ၀န်ထမ်းကယ်ဆယ်ရေးနှင့် ပြန်လည် နေရာချထားရေး ၀န်ကြီးဌာနအပါ အ၀င် အခြားသောဝန်ကြီးဌာနများ၊ အဖွဲ့အစည်းများ ပါဝင်သည့် အဖွဲ့ဖွဲ့ ကာ ပြင်ဆင်သည့်ကာလတွင် ရှိနေ ကြောင်းသိရသည်။ လူငယ် မူဝါဒ ရေးဆွဲရန် သုံးနှစ်ခန့်ကြာမည်ဖြစ် ကြောင်း သိရသည်။
“ဒါတွေကို ရင်ဆိုင်ဖို့လိုတယ်။ ဖြေရှင်းဖို့လိုတယ်။ လူကြီးတွေက လည်း အသိအမှတ်ပြုဖို့လိုတယ်။ အသိအမှတ်ပြုတဲ့အခါကျရင် အပြစ် တွေပြောနေမယ့်အစား ဒါတွေကို ဘာကြောင့်ဖြစ်တယ်။ ဘယ်လိုကာ ကွယ်မလဲ ဖြစ်လာတဲ့အခါ ဒီပြဿနာ တွေကို ဘယ်လိုဖြေရှင်းမလဲ။ တိုင်း ပြည်တည်ဆောက်တဲ့နေရာမှာ လက် တွဲပြီးလုပ်ဆောင်နိုင်ဖို့က ကြိုးစား အားထုတ်ပြီးတော့ ရှောင်သွားလို့မရ တဲ့ကိစ္စလေးတွေကို အသိအမှတ်ပြု မယ်၊ ရင်ဆိုင်မယ်၊ ကျော်လွှားသွား မယ်ဆိုရင် အားလုံးက အောင်အောင် မြင်မြင်နဲ့ လူငယ်လူရွယ်အရွယ်ကို ဖြတ်ကျော်ပြီးမှ လူကြီးဖြစ်ကြမှာပေါ့”ဟု ဦးရဲမြင့်က ဆိုသည်။

(စစ်ထက်အောင် )

အတွဲ ၂ အမှတ်စဉ် ၂၆၊ သည်လေဒီးစ် နယူးစ်ဂျာနယ်။

ကလေးတို့အတွက် အိပ်ရာဝင် ပုံပြင်

ကလေးတွေကို ဘယ်အရွယ်လောက်မှာ စာ စဖတ်ပြရမလဲ၊ ပုံပြင်လေးတွေကို စပြောပြရမလဲ ဆိုတာကို ကလေးမိခင် တော်တော် များများ သိချင်ကြပါတယ်။ ကလေးသုတေသီတွေ၊ ပညာရှင်တွေရဲ့ အဆိုအရ  ကလေးကို စာဖတ်ပြဖို့ အတွက် ကလေးကတော့ဖြင့် ငယ်သေးတယ်၊ နားမလည်နိုင်သေးပါဘူး ဆိုတဲ့ အရွယ် ဆိုတာ မရှိပါဘူးတဲ့။ အမေရဲ့ ဗိုက်ထဲမှာ နေနေတဲ့ သန္ဓေသားဘဝမှာ ကတည်းက ကလေးကို စာဖတ်ပြသင့် တယ် လို့ ပညာရှင်များက ဆိုပါတယ်။

ဒီလိုမျိုး ကလေးကို  စာဖတ်ပြခြင်း အားဖြင့် ကလေးတို့ရဲ့ နားထောင်မှုစွမ်းရည် (Listening Skills) တိုးတက် လာမှာ ဖြစ်သလို၊ စကားမြန်မြန် တတ်ပြီးတော့ စကားလည်း ကြွယ်လာမယ် လို့ ဆိုပါ တယ်။ ဗိုက်ထဲက မမွေးသေးတဲ့ ကလေးနဲ့ မွေးစပေါက် နီတာရဲလေးတွေကို စာဖတ်ပြရမယ် ဆိုတော့ တော်တော်လေးကို ကြောင်တောင်တောင် နိုင်တဲ့ အလုပ်ပဲလို့ ထင်စရာ ရှိပါတယ်။ ဒါပေမယ့် ဒါဟာ ကလေးတို့ စာဖတ်ဝါသနာ ပါစေဖို့ အတွက် အစောဆုံးချပေးလိုက်တဲ့ မျိုးစေ့တစေ့ပါပဲ။

သုံးလေးလသားလောက် ရောက်ပြီ ဆိုတာနဲ့ ဖွံ့ဖြိုးပြီး နိုင်ငံများမှာတော့ စာအုပ်တွေဟာ ကလေးတို့ အတွက် အင်မတန်မှ စိတ်ဝင်စားစရာ ကောင်းတဲ့ ကစားစရာ ပစ္စည်း တမျိုး ဖြစ်လာပါပြီ။ ဘာဖြစ်လို့လဲ ဆိုတော့ သူတို့ ဆီက စာအုပ်တွေက ဖိကြည့်၊ နှိပ်ကြည့်ရင် အသံထွက်တဲ့၊ အရောင်တွေ အလင်းတွေ ထွက်တဲ့ စာအုပ် မျိုးတွေ၊ လက်ထိုးရုပ်လိုမျိုး ကစား လို့လည်းရ စာဖတ်လို့လည်း ရတဲ့ စာအုပ်မျိုးတွေမို့ပါ။ ကတ်ထူစာရွက် အထူကြီးတွေနဲ့မို့လို့  ကလေးတို့ စာရွက်တွေကို ဖြဲပြီးတော့ ပါးစပ်ထဲ ထည့်မှာကို လည်း မပူရပါဘူး။ အစစ အရာအရာ နောက်ကျနေတဲ့ ကျမတို့ တိုင်းပြည်မှာတော့ ဒီလို ကလေးအငယ် လေးတွေအတွက် ဖတ်စရာ၊ ဆော့စရာ စာအုပ်ရယ်လို့ တူတူတန်တန် မရှိသေးပါဘူး။

စာဖတ်ဝါသနာဆိုတာဟာ ငယ်ငယ်လေးက တည်းက ကလေးတို့ကို  လေ့ကျင့်ပေးရမယ့် အလေ့ကျင့်ကောင်း တခုပါ။ ကျမတို့ ငယ်ငယ်တုန်းကလည်း စာမဖတ်တတ်ခင်မှာ ဖွံ့ဖြိုးပြီး နိုင်ငံက ကလေးတွေလိုမျိုး စာအုပ် တွေကို ချစ်တတ်အောင်၊ စာအုပ်တွေနဲ့ ရင်နှီးကျွမ်းဝင်လာအောင်လို့ ဆော့ ကစားစရာ အရောင်တွေ၊ အရုပ် တွေပါတဲ့ စာအုပ် မျိုးတွေ မရှိခဲ့ကြပါဘူး။

ဒါပေမယ့် ကျမတို့ရဲ့ စူးစမ်း လိုစိတ်လေးတွေကို အညွှန့်သန်လာစေ ဖို့နဲ့ ရသဆိုတာရဲ့ အရသာကို မြည်းစမ်း ရင်းနဲ့ စွဲလမ်းသွားစေဖို့ အတွက် အိပ်ရာဝင် ပုံပြင်လေးတွေက ကျမတို့ကို ဆွဲယူခေါ်ငင် ခဲ့ပါတယ်။ ကြက် သားအမိ ပုံပြင်၊ ရွှေ ယုန်ရွှေကျား၊ ပိုနေမြဲ ကျားနေမြဲ စတဲ့ ပုံပြင်လေးတွေ၊ မနှင်းဖြူလေးနဲ့ လူပုလေးတွေရဲ့ ပုံပြင်လေးတွေဟာ ကျမတို့ရဲ့ စာဖတ်ဝါသနာ အတွက် မျိုးစေ့တွေ ပါပဲ။

မြွေမင်းသားပုံပြင်တွေ၊ ဇာတ်တော်တွေထဲက  ပဋာစာရီ၊ မဟော်သဓာ စီရင်ခန်းစတဲ့ ပုံပြင်ဇာတ်လမ်း တွေကို နားထောင်ရင်းနဲ့ ကျမတို့ အိပ်ရာဝင်ခဲ့ကြတယ်။ ရယ်စရာ ပုံပြင်တွေ၊ စိတ်လှုပ်ရှားစရာ ပုံပြင်တွေ၊ ဘုရား ဇာတ် နိပါတ်တော်တွေ ထဲက ပုံတွေ၊ ဒါတွေကို စာမဖတ်တတ်ခင် ကတည်းက အဘွားတို့ အမေတို့ ပြောပြတဲ့ အိပ်ရာဝင် ပုံပြင်တွေထဲက တဆင့် ကျမတို့ သိနေခဲ့ကြပါပြီ။ ပုံပြင်တွေက တဆင့် ကျမ တို့ဟာ စိတ်နှလုံး လိမ္မာယဉ်ကျေး ခဲ့ကြတယ်၊ စိတ်ထား နူးညံ့ပျော့ပျောင်း လာခဲ့ကြရတယ်။

တကယ်တော့ အိပ်ရာဝင် ပုံပြင်ပြောပြခြင်းဟာ ကလေးတို့ အတွက် အင်မတန်မှ အကျိုးရှိစေပါတယ်။ အိပ်ရာဝင် ခါနီးတိုင်းမှာ စာဖတ်ပြခြင်း၊ ပုံပြင်ပြောပြခြင်းဟာ ကလေးတို့ကို အချိန်မှန်မှန် သိပ်ဖို့၊ တနည်း ပြောရရင် ကလေးတို့ အိပ်ရာထဲကို ဝင်ဖို့ အတွက် အကောင်းဆုံး ဆွဲဆောင်နိုင်တဲ့ နည်းတနည်းပါပဲ။ မအိပ်ခင်မှာ ကလေးနဲ့ အမေ (သို့မဟုတ်) အဖေတို့ အတူတူ ပုံပြင်လေးတွေ ပြောကြ၊ စာအုပ်လေးတွေ ဖတ်ကြရတဲ့ အတွက် ကလေးနဲ့ မိဘကြားမှာ တဦးနဲ့ တဦး ချစ်ခင်ရင်းနှီးမှု ပိုလာစေပါတယ်။

တနေ့လုံး ကလေးနဲ့ ခွဲနေရပေမယ့် အိပ်ရာဝင်ချိန်လေးမှာ ကလေးတို့ကို ပုံလေးတွေ ပြောပြတာ၊ ကလေးတို့ သိချင်တဲ့ မေးခွန်းလေးတွေကို ပုံပြင်ပြောရင်းနဲ့ ဖြေကြားပေးတာတွေ လုပ်လိုက်ရတာဟာ ဆယ် မိနစ်၊ ဆယ့်ငါး မိနစ် လောက်သာကြာပေမယ့် ကလေး တို့အတွက်ကတော့ တဘဝလုံး သတိရနေစေမယ့် အမှတ်ရစရာလေး တွေပါပဲ။ ပုံပြင်တွေ၊ ဇာတ်လမ်းတွေထဲက ဇာတ်ကောင်လေးတွေကို အားကျရင်း၊ အတုယူရင်းနဲ့ပဲ  ကလေးတို့ဟာ  လူ့လောကမှာ ကလေးတို့ လိုက်နာရမယ့်၊ စိတ်ယဉ်ကျေးမှု၊ ကိုယ်ယဉ်ကျေးမှု လေးတွေကို ပုံပြင်လေးတွေထဲက တဆင့် သူတို့ဘာသာ သူတို့ သင်ယူသွားကြ ပါလိမ့်မယ်။

ပုံပြင်လေးတွေဟာ ကလေးတွေရဲ့ စိတ်ကူး စိတ်သန်းကို ပိုပြီးတော့ အားကောင်း လာအောင်လို့  လုပ်ပေးနိုင် သလို၊ တီထွင်ဖန်တီးမှု စွမ်းရည်ကိုလည်း တိုးတက်လာအောင်လို့ လုပ်ပေးနိုင်ပါတယ်။ အထူးသဖြင့် ကျောင်း နေတဲ့ အရွယ်မှာ အင်မတန် အရေးကြီးတဲ့ စွမ်းရည်ကြီး တခုဖြစ်တဲ့ အာရုံ စူးစိုက်နိုင်စွမ်းကို  ပုံပြင်လေးတွေ နားထောင်ခြင်းက ရရှိစေပါတယ်။ ပုံပြင်လေးတွေ နားထောင်ရတာကို မကြိုက်တဲ့ ကလေးဆိုတာ မရှိပါဘူး။

ဒီဘက်ခေတ်မှာတော့  မိခင်ရော  ဖခင်ပါ အလုပ် လုပ်ကြရပြီး အိမ်ပြန်ရောက်ပြီ ဆိုရင်လည်း မိုးချုပ် ပင်ပန်း နေကြပြီမို့ ကလေးတွေကို ပုံပြင်နဲ့ ချော့သိပ်ဖို့ မလုပ်နိုင်ကြတော့ပါဘူး။ အိမ်မှာ ကျန်ရစ်ခဲ့တဲ့ အဘွား၊ အဒေါ် စသူတို့ကလည်း တီဗီ ဇာတ်လမ်းတွဲတွေထဲမှာ မျောပါနေကြတာမို့ ဟိုးအရင် ကျမတို့ ငယ်ငယ်တုန်းက လိုမျိုး ကလေးတွေကို  ပုံပြောပြဖို့ အချိန်တွေ နည်းလာကြပါတယ်။ နည်းပညာ တိုးတက်လာတဲ့ ခေတ် ဖြစ်လာတာမို့ ကလေးတို့ နှစ်နှစ် သုံးနှစ် လောက်ရောက်ပြီ ဆိုရင် အိုင်ပက်ဒ်၊ တက်ဘလက်နဲ့ ဖုန်းတို့မှာပါတဲ့ ဂိမ်းတွေကို ကလေးတွေ ကစားတတ် လာကြပါပြီ။

ကလေးတို့ဟာ ပုံပြင်တွေထဲက ယုန်ကလေးတွေ၊ စိတ်ကောင်းရှိတဲ့ မင်းသမီးလေးတွေ၊ စိတ် ယုတ်မာရှိတဲ့ စုန်းမကြီးတွေ စတဲ့ ဇာတ်ကောင်တွေ အစား သေနတ်ပစ်လိုက်၊ ဗုံးခွဲလိုက်လို့ အကောင် လေးတွေ သေသွားတဲ့  ဂိမ်းတွေကို သဘောကျတတ် လာပါပြီ။

ပုံပြင်လေးတွေမှာ ပါတဲ့ စိတ်ကောင်းရှိတာ၊ စိတ်ယုတ်မာရှိတာ၊ ဝမ်းသာ စရာကောင်းတာ၊ ဝမ်း နည်းစရာ ကောင်းတာ၊ ဒေါသထွက်တာ၊ ကြောက်တာ စတဲ့ ရသခံစားချက်တွေဟာ ကလေးတို့ကို ကိုယ့်ရဲ့ စိတ်ခံစားချက် နဲ့ တဖက်လူရဲ့ စိတ်ခံစားချက်တွေကို နားလည်တတ်စေဖို့ အတွက် ပုံပြင်များက တဆင့် သင်ပေးနိုင်ပါတယ်။ ကိုယ့်ရဲ့ စိတ်ပိုင်းဆိုင်ရာ ခံစားချက်နဲ့ တဖက်လူရဲ့စိတ်ခံစားချက်ကို နားလည်သူများဟာ ကိုယ့်စိတ်နဲ့ ကိုယ့်ကိုယ်ကို ထိန်းချုပ်နိုင်စွမ်း (Self-control)  ရှိလာကြပါတယ်။ ဒါဟာ ကလေးတို့ကို စိတ်ဉာဏ်ရည် မြင့်တက်လာ အောင်လို့ လုပ်ပေးခြင်းပါပဲ။

ဒါကြောင့် မို့လို့ တိုးတက်တဲ့ နိုင်ငံများမှာတော့ ကလေးတို့ အတွက် ပုံပြင်လေးတွေ၊ ကလေးဖတ်ဖို့ စာအုပ်လေး တွေကို အမြောက်အမြား ရေးသားကြ ထုတ်ဝေပေးကြသလို၊ မိဘများကလည်း ကလေးများကို အချိန်ပေးပြီး တော့ ပုံပြောတာမျိုး၊ စာအုပ်ဖတ်ပြ တာမျိုး လုပ်ပေးတတ်ကြပါတယ်။ ကျမတို့ဆီမှာကတော့ ကလေးတွေ ဖတ်ဖို့ ပုံပြင် စာအုပ်လေးတွေ အများကြီး ရှိလှသေးတာ မဟုတ်ပါဘူး။ ဒါပေမယ့် ရှိတဲ့ ပုံပြင်လေးတွေနဲ့ပဲ အိပ်ရာဝင် ပုံပြင်လေးတွေ အဖြစ် ကလေးတို့ကို ပြောပြလို့ ရပါသေးတယ်။

ပုံပြင်တွေဟာ တကယ်တော့ ကလေးတွေ အတွက် ကျောင်းသင်ခန်းစာလိုပဲ အင်မတန်မှ အရေးကြီးတဲ့ အရာ ပါ။  ကလေးဘဝ ကာလမှာ ကလေးတို့ဟာ ပုံပြင်လေးတွေကို နားထောင်ဖို့၊ ပုံပြင်လေးတွေနဲ့ ကြီးပြင်းဖို့ လိုပါ တယ်။ ပုံပြင်လေးတွေဟာ ကလေး တို့ကို  တီထွင်ဖန်တီးမှု အားကောင်းတဲ့၊ စိတ်ကူး စိတ်သန်း အားကောင်း တဲ့၊ ကိုယ့်စိတ်ကိုယ် ထိန်းချုပ်နိုင်စွမ်းရှိတဲ့ လူကြီးလူကောင်း စိတ်တွေနဲ့ ကြီး ပြင်းလာစေဖို့ လုပ်ပေးနိုင်စွမ်း ရှိပါ တယ်။ ဒါကြောင့်မို့လို့ မိဘများအနေနဲ့ ကိုယ့်ရဲ့ အားလပ်ချိန်လေး တွေထဲကနေ ကလေးတွေကို ပုံပြောဖို့ တနေ့ ကို ၁၀ မိနစ်လောက် အချိန်လေး ဖဲ့ပေးပြီးတော့ ကလေးတို့ကို ပုံပြင်လေးတွေ ပြောပြပေးကြပါလို့။     ။

ခေတ်ဘုန်းသစ် (ဧရာဝတီ Blog)

ပြိုကွဲသွားတဲ့ မိသားစုရဲ့ မြေစာပင်လေးတွေ

မိသားစုဘ၀ ဆိုတာဟာ ကလေးတို့အတွက် အရေးကြီးပါတယ်။ ကလေးတို့အတွက် အရေးကြီးတဲ့ မိသားစုဘ၀လေးကို ပျော်စရာ မိသားစုဘ၀လေးဖြစ်အောင်လို့ ထိန်းကျောင်းရမယ်၊ ပြုစုရမယ်လို့ ကလေးစိတ်ပညာရှင်များက ဘယ်လောက်ကြီးပဲ ပြောနေပါစေ တကယ့်ဘ၀ထဲမှာတော့မိစုံ၊ ဘစုံနဲ့ ပျော်စရာကောင်းတဲ့ မိသားစုဘ၀မျိုးကို ဖန်တီးနိုင်ဖို့ဆိုတာသိပ်မလွယ်လှပါဘူး။ ကလေးတိုင်း ကလေးတိုင်းဟာလည်း မိသားစု စုံလင်တဲ့၊ပျော်စရာကောင်းတဲ့ မိသားစုဘ၀များကို မရနိုင်ကြပါဘူး။

မိဘ ဆုံးပါးသွားတာမျိုးပဲဖြစ်ဖြစ်၊ အဖေနဲ့အမေ တဦးနဲ့တဦး မချစ်ကြတော့လို့ ကွဲကြ၊ ကွာကြတော့တာပဲ ဖြစ်ဖြစ် အင်မတန်နုနယ်တဲ့ ကလေးတို့နှလုံးသားမှာ စိတ်ဒဏ်ရာ အကြီးကြီး ရကြရတာကတော့ဖြင့် မငြင်းနိုင်အောင်ပါပဲ။ အထူးသဖြင့် ကိုယ်ချစ်တဲ့ အဖေနဲ့ အမေတို့ တကွဲစီနေကြတော့မယ်၊လင်မယား ကွာရှင်းကြတော့မယ်လို့ သိလိုက်တဲ့အချိန်မှာ ခံစားကြရတဲ့ ကလေးတို့ရဲ့ ခံစားမှုကတော့သနားစရာ ကောင်းလောက်အောင်ပဲ ပြင်းထန်လွန်းလှပါတယ်။

ဟိုးအရင် ကျမတို့ အဘိုး၊ အဘွားများ ခေတ်တွေ၊ ကျမတို့ရဲ့ အဖေ၊ အမေတွေရဲ့ ခေတ်တွေမှာတော့ လင်မယားကွာရှင်းတယ်တို့၊ နောက်ယောက်ျား၊ နောက်မိန်းမ ယူတယ်တို့ဆိုတဲ့ ဖြစ်ရပ်မျိုးက တော်တော်လေး ရှားပါတယ်။ ဒါပေမယ့် ဒီဘက်ခေတ်မှာတော့ လင်မယားကွာရှင်းမှုများဟာ ဟိုးအရင် ခေတ်တွေကထက်စာရင် တော်တော်လေး များလာပါပြီ။ လင်မယား ကွာရှင်းကြတဲ့ကိစ်္စတွေဟာ အကြောင်းများစွာ ရှိကြပေမယ့် အများဆုံးကတော့ အချစ်သစ်ထပ်တွေ့ကြလို့ ကွာကြတာများပါတယ်။ ကွာရှင်းကြတဲ့ အကြောင်းတွေထဲမှာ နောက်ထပ်အကြောင်းတခုကတော့ နှစ်ဖက်ဆွေမျိုးများရဲ့ ၀င်စွက်ဖက်မှုကြောင့်ပါ။ တခြားအကြောင်းတွေ ဖြစ်တဲ့ယောက်ျားက အရက်သောက်တာ၊ ဖဲရိုက်တာ၊ မိန်းမက နှစ်လုံးထီ ထိုးတာ၊ လည်ပတ်ဝယ်ခြမ်း၊ ဖြုန်းသုံးတာစတဲ့အကြောင်းတွေနဲ့ ကွာရှင်းကြတာ ကတော့ဖြင့် မြန်မာလူမျိုးများပီပီသည်းခံနိုင်ကြတာမို့ ဒီလိုကိစ္စတွေနဲ့ ကွာရှင်းတာမျိုးဟာ သိပ်ကိုမှ နည်းလွန်းပါတယ်။ ဘာကြောင့်ပဲ ကွာကွာ မိဘနှစ်ပါး ကွားရှင်းကြပြီဆိုရင်ဖြင့် ကြားထဲကမြေစာပင်ဖြစ်တဲ့ သားသမီးများကတော့ စိတ်ဆင်းရဲကြရတာပါပဲ။

အထူးသဖြင့် အဖေနဲ့ အမေတို့ ကွာရှင်းမယ့်ကာလကို မရောက်ခင်မှာပဲ တခြိမ်းခြိမ်းနဲ့ ဖြစ်ကြတဲ့ ရန်ပွဲတွေကို ကလေးတို့ခမျာ ကြုံကြရ၊ ကြားကြရပါပြီ။ တယောက်နဲ့တယောက် နစ်နာစေမယ့် စကားလုံး တွေနဲ့ တယောက်ကိုတယောက် တိုက်ခိုက်တဲ့စကားလုံးတွေနဲ့ ဒေါသတကြီး အပြန်ပြန်အလှန်လှန် ပြောဆိုနေတာကို စိတ်မချမ်းမြေ့စွာနဲ့ ကြားနေကြရပါတော့တယ်။ တချို့ မိဘတွေကတော့ ရန်ဖြစ်ကြရင် နင်က ဘာကောင်ပဲတို့၊ နင်ကတော့ ဘာကောင်မပဲတို့ ဆိုတဲ့စကားလုံးတွေကို ကလေးတို့ရဲ့ ရှေ့မှာတောင်မှ မဆင်ခြင်ဘဲ တယောက်ကိုတယောက်ပြောတတ်ကြပါသးတယ်။ ဒီအခါမှာတော့ အဖေရဲ့ မကောင်းကွက်တွေကို အမေက ထုတ်ဖော်ပြောတာကို ကြားရ၊ အမေရဲ့ မကောင်းကွက် မှန်သမျှကိုအဖေက ထုတ်ဖော်ပြောတာကို ကြားရတဲ့ ကလေးတို့ခမျာ ကိုယ့်ရဲ့ မိဘတွေကို အထင် သေးစိတ်၊ စိတ်ပျက်စိတ်တွေ ၀င်လာတတ်ကြပါတယ်။ ငါဟာ ဒီလိုမကောင်းတာတွေ အများကြီးလုပ်ထားတဲ့ အဖေ၊ အမေတို့ရဲ့ သားသမီးပါလား ဆိုပြီးတော့လည်း ကိုယ့်ကိုယ်ကိုယ် သိမ်ငယ်စိတ်တွေ ၀င်လာတတ် ပါတယ်။ တချို့မိဘများကတော့ သူတို့ရဲ့ ရန်ပွဲတွေမှာ မဆီမဆိုင် ကလေးတွေကိုပါ ထည့်သွင်းတတ်ကြ ပြန်ပါသေးတယ်။ 

ဥပမာ - ““နင်တို့ကြောင့် ငါ့မှာ ၀ဋ်ခံနေရတာ၊ နင်တို့ကို မမွေးလာခဲ့ဘူးဆိုရင် သိပ်ကောင်းမှာပဲ”” စသဖြင့် ကလေးတွေကြောင့်ပဲ ကိုယ့်မြှာဒီလိုဒုက္ခတွေခံနေကြရသယောင်ယောင်နဲ့ ပြောဆိုတတ်ကြပါသေးတယ်။ အဲဒီအခါမှာတော့ ငယ်ရွယ်သေးတဲ့ ကလေးတွေမှာရော၊ ဆယ်ကျော်သက်ထဲကို ၀င်ရောက်စပြုနေတဲ့ ကလေးတပိုင်း၊ လူကြီးတပိုင်း အရွယ်တွေမှာပါ သူတို့ကြောင့်ပဲ အဖေနဲ့ အမေ ပြဿနာဖြစ်ရသလိုလို၊ အဖေနဲ့ အမေရဲ့ ကွာရှင်းမှုထဲမှာ သူတို့ရဲ့အပြစ်တွေပဲ ပါနေသလိုလို ထင်ပြီးတော့ စိတ်ဆင်းရဲခြင်းကြီးစွာ ဖြစ်ကြ ရပါတယ်။ ငါဟာ လူမဖြစ်ထိုက်ဘူး၊ လူ့ဘ၀ကို မှားယွင်းပြီးရောက်လာတာပဲ။

တကယ်တော့ ငါ့ကိုအဖေရော၊ အမေကပါ မလိုချင်ကြတာပါလားလို့ တွေးပြီးတော့ စိတ်ထဲမှာ ၀မ်းနည်း ထိခိုက် နာကြည်းတတ်လာပါတော့တယ်။ တကယ်တော့ ဒီလိုမျိုး ကလေးတွေကို စိတ်ပျက်၊ ၀မ်းနည်း နာကြည်းအောင်လို့ မပြောဆိုရင်တောင်မှ အဖေနဲ့အမေ ကွာရှင်းကြတော့မယ်၊ အတူတူမနေရတော့ဘူး ဆိုတဲ့ကိစ္စဟာ ကလေးတို့အတွက် အင်မတန်မှကြောက်စရာကောင်း တဲ့ ကိစ္စရပ်ကြီးပါပဲ။

နိုင်ငံရပ်ခြားမှာတော့ ကွာရှင်းကြပြီဆိုရင်ဖြင့် ကလေးတို့ဟာ သူတို့နဲ့အတူတူမနေရတဲ့ အဖေ (သို့မဟုတ်) အမေနဲ့ တပတ်တကြိမ် (သို့မဟုတ်) တလတကြိမ် စသဖြင့် တွေ့ခွင့်ရကြပါတယ်။ ဒါပေမယ့်ကျမတို့ဆီ မှာတော့ ဒီလိုမျိုးကြည်ကြည်ဖြူဖြူနဲ့ ပေးတွေ့တာမျိုး သိပ်ကိုမှရှားလှပါသေးတယ်။ ကလေးဟာ အဖေ (သို့မဟုတ်) အမေနဲ့ အတူတူနေပြီဆိုပါတော့။ အတူတူနေရတဲ့ အဖေ(သို့မဟုတ်) အမေ (သို့မဟုတ်) အဘိုး၊ အဘွား၊အဒေါ် စသူတို့က နင့်အဖေက ဘယ်လိုမကောင်းတာ၊ နင့်အမေက ဘယ်လိုမကောင်းတာ စသဖြင့်ကလေးနဲ့ အတူမနေသူ အဖေ၊ အမေရဲ့ မကောင်းကြောင်းတွေ၊ စိတ်နာစရာတွေ၊ ကလေးအရွယ်နဲ့မသိသင့်သေးတဲ့ အဖြစ်ပျက်မျိုးတွေကို ကလေးကိုပြောပြတာမျိုးတွေလည်း ကျမတို့ဆီမှာ ရှိနေဆဲပါ။

အဲဒီလိုပဲ ကလေးက အမေ့ကို တွေ့ချင်တယ်တို့၊ အဖေကို တွေ့ချင်တယ်တို့ ပြောမိရင်လည်း ကလေးကို မဲပြီးတော့ ရိုက်တာမျိုးတွေ ရှိနေဆဲပါပဲ။ ဒီလိုပြုလုပ်ခြင်းဟာ ကလေးက ကိုယ့်ရဲ့ဘက်တော်သားဖြစ်ဖို့၊ ကိုယ့်တယောက်တည်းကိုပဲ ချစ်ဖို့ ဆိုတဲ့အတွေးတွေနဲ့ လုပ်ကြတာ များပါတယ်။ ဒါပေမယ့် အဲဒီလိုလုပ်လိုက်ခြင်းကြောင့် ကလေးတို့ရဲ့ ဘ၀မှာအင်မတန်မှအရေးကြီးတဲ့ ကိုယ့်ကိုယ်ကိုယ် ယုံကြည်တဲ့စိတ် (Self-Confidence) နဲ့ ကိုယ့်ကိုယ်ကိုယ်အကောင်းမြင်စိတ်၊ အထင်ြကီးစိတ် (Self Esteem) ကိုပြိုပျက်သွားအောင်လို့ လုပ်လိုက်ခြင်းပဲ ဆိုတာကိုတော့ဖြင့် မိဘများခမျာ သတိမပြုမိ တတ်ကြပါဘူး။

အိမ်ထောင်ရေး ပြိုကွဲတဲ့အချိန်မှာ ကိုယ်ကိုယ်တိုင်က တဖက် အိမ်ထောင်ဖက်ပေါ်မှာ စိတ်ပျက်ရ၊ ဒေါသထွက်ရ၊ ၀မ်းနည်းရ၊ စိတ်အနှောင့်အယှက်ဖြစ်ရတာတွေ ရှိနိုင်ပါတယ်။ ဒါပေမယ့် မိဘတွေကြားမှာ ဘာမှနားမလည်ရှာတဲ့၊ အပြစ်ကင်းစင်တဲ့ ကလေးတို့ရဲ့ ရင်ထဲမှာ စိတ်ဒဏ်ရာမရစေဖို့အတွက်တော့ဖြင့် သတိထားကြရမှာပါပဲ။ ကိုယ့်အတွက်က မုန်းစရာ အင်မတန်ကောင်းတဲ့မိန်းမ (သို့မဟုတ်) ယောက်ျား ဖြစ်နေပေမယ့် ကလေးတွေအတွက်ကတော့ သူတို့ရဲ့ အမေ (သို့မဟုတ်)အဖေပါပဲ။ အဖေနဲ့ အမေဟာ အကြောင်းကြောင်းတစ်ယောက်နဲ့တစ်ယောက် အတူတူနေလို့မရတော့ပေမယ့် ကလေးတွေကိုတော့ ချစ်နေတုန်းပဲ၊ မိဘနှစ်ပါး ကွဲကွာခြင်းဟာ ကလေးတွေနဲ့ ဘာမှမဆိုင်တဲ့ အကြောင်း၊ ဖေဖေကလည်း သမီးတွေနဲ့အတူတူမနေတော့ပေမယ့် သမီးတို့တွေ့ချင်တဲ့အချိန်မှာ အဖေနဲ့တွေ့လို့ရသလို ဖေဖေက ဘယ်နားမှာပဲနေနေ သမီးတို့ရဲ့ အမြဲတမ်း ဖေဖေပဲ ဆိုတာကိုကလေးတို့ သိအောင်၊ နားလည်အောင်လို့ ရှင်းပြဖို့လိုပါတယ်။

အိမ်ထောင်ရေး ပြိုကွဲတယ်ဆိုတာဟာ လူကြီးတွေအတွက် စိတ်ဆင်းရဲစရာ ကောင်းလှတဲ့ ဖြစ်ရပ်ကြီးတခု ဖြစ်သလို၊ ကလေးများအတွက်လည်း သိမ်ငယ်၊ ၀မ်းနည်း၊ အားငယ်စရာ အင်မတန်ကောင်းလှတဲ့ အပြောင်းအလဲကြီးတခုပါပဲ။ ဒီဖြစ်ရပ်ကြောင့် အားငယ်စိတ်၊ ၀မ်းနည်းစိတ်နဲ့ သိမ်ငယ်စိတ်တွေဝင်လာမယ် ဆိုရင်ဖြင့် ကလေးတို့ရဲ့ ပေါင်းသင်းဆက်ဆံရေးစွမ်းရည် (Social Skill) ကို ထိခိုက်စေရုံသာမက ကလေးတို့ဟာ ကိုယ့်ကိုယ်ကိုယ်ရော၊ ကိုယ့်ပတ်ဝန်းကျင်က လူတွေကိုပါ အကောင်းမမြင်တတ်ကြ တော့ပါဘူး။ မိသားစု ပြဿနာများကြောင့် ကလေးတို့ဆိုးလာကြတယ။် ဂျစ်ကန်ကန်နိုင်လာကြတယ်တို့ဆိုတဲ့ အပြုအမူ တွေဟာ ကလေးတို့ရဲ့ စိတ်ထဲမှာ Self Esteem လို့ ခေါ်တဲ့ ကိုယ့်ကိုယ်ကိုယ် ယုံကြည်အကောင်းမြင်တဲ့ စိတ်ပြိုကွဲ ပျက်စီးသွားရလို့ပါပဲ။ ဒီလို ပြိုကွဲ ပျက်စီးရခြင်းဟာ ကလေးတို့ရဲ့ အနာဂတ် ပညာရေးလမ်းကြောင်းကို ထိခိုက်စေရုံသာမက ကလေးငယ်လေးပဲဖြစ်ဖြစ်၊ ကလေးကြီးပဲဖြစ်ဖြစ် ပျက်စီးလေလွင့်သွားစေနိုင်ပါတယ်။

ဒါကြောင့်မို့လို့ ကလေးတို့ စိတ်ပိုင်းဆိုင်ရာမနာကျင်၊ မထိခိုက်၊ မပျက်စီးစေဖို့အတွက် မိဘဆွေမျိုးများက ကိုယ့်ရဲ့ အမုန်းတရားတွေ၊ မကျေနပ်ချက်တွေကို ကလေးဆီကို ပုံမချဘဲနဲ့ ကလေးတို့ကိုကြင်နာမေတ္တာစိတ် ထားပြီးတော့ ၀ိုင်းဝန်း ကူညီစောင့်ရှောက်ဖို့လိုပါတယ်။ ဒါဆိုရင်ဖြင့် အကြောင်းကြောင်းကြောင့် မိဘ အစုံအလင်နဲ့ နေခွင့်မရရှာကြတဲ့ ကလေးတို့ခမျာ ကိုယ့်အနားက မိစုံ၊ ဖစုံနဲ့ ပျော်ပျော်ရွှင်ရွှင် နေနေကြတဲ့ ကလေးတွေကို မြင်ကြပေမယ့်လည်း အားငယ်စိတ်တွေ၊ သိမ်ငယ်စိတ်တွေ၊ ၀မ်းနည်း စိတ်တွေ နည်းသွားကြ မှာပါပဲ။ မိစုံဖစုံနဲ့ နေခွင့်ရသည်ဖြစ်စေ၊ မရသည်ဖြစ်စေ ကလေးတို့အတွက် အရေးကြီးဆုံး အရာကတော့ ကလေးဘ၀ ကာလလေးမှာ ပျော်ရွှင်မှုတွေ မပျောက်ဆုံးဖို့ပါပဲ။ အပူအပင် ကင်းမဲ့စွာနဲ့နေခွင့်ရတဲ့ ကလေးဘ၀ကာလ ခဏတာလေးမှာကလေးတို့ဟာ ကံမကောင်း အကြောင်းမလှလို့ မိစုံဖစုံနဲ့ နေခွင့်မရကြသည့်တိုင်အောင် ချစ်ခြင်းမေတ္တာနဲ့ စောင့်ရှောက်ကြင်နာတတ်တဲ့ မိဘတို့ရဲ့ ရင်ငွေ့ထဲမှာ ပျော်ရွှင်စွာနဲ့နေခွင့်ရစေဖို့ လိုပါတယ်။

ခေတ်ဘုန်းသစ်

ငယ်လေလည်လေ ကြီးလေဖြီးလေ

ကလေးအရွယ် 

ရပ်ကွက်အတွင်းမှကလေးတစ်သိုက် ပိုက်ဆံထောင်၍ ကျောက်ဒိုးနှင့်ပစ်သည့် ကစားနည်းကို ကစားလျက် ရှိသည်။ အကြွေစေ့မရှိတော့သည်ဖြစ်၍ တစ်ရာတန်၊ နှစ်ရာတန် ငွေစက္ကူများအား အသေးဆုံး အရွယ် ဖြစ်အောင် ခေါက်ကာ မြေပေါ် တွင် စိုက်၍ထောင်သည်။ ခြေလှမ်း ၁၀လှမ်းခန့် အကွာမှ ကျောက်ဒိုးဖြင့် ထိအောင်ပစ်ခြင်း ဖြစ်သည်။ မည်သူကစ၍ ပစ်မည်ကို စည်းနီးလု၍ ဆုံးဖြတ်ကြသည်။ ပစ်၍လဲလျှင် လဲသည့် ငွေစက္ကူခေါက်အား ယူနိုင်သည်။ သုံး၊လေးခုလဲလျှင်လည်း သုံး၊လေးခုယူရန်ဖြစ်သည်။ တစ်ယောက်တစ်လှည့်စီ ပစ်ပြီးချိန်၊ ငွေစက္ကူခေါက်များ ကျန်နေပါက ထပ်ပစ်မည်လား၊ ထပ်ဖြည့်မည်လား ဆိုသည်ကို အားလုံးသဘောတူဆုံးဖြတ်ကြသည်။

မကြာခဏ အကျန်များခြင်း၊ ကျန်သည့် တစ်ခု၊ နှစ်ခုမှာ ပစ်ရန်ခက်ခြင်းဖြစ်လာသည့်အခါ ကစားပုံကို တစ်မျိုးပြောင်းကြသည်။ တစ်ခုလဲ တစ်ခုယူမဟုတ်တော့။ ခေါင်ထိအကုန်ယူဖြစ်လာသည်။ ထိုနည်းတွင် ထိသည့် ငွေစက္ကူ မှစ၍ ပစ်သူဘက်မှ ငွေစက္ကူအားလုံး ရနိုင်ပေသည်။ တစ်ယောက်တစ်ပေါက်ငြင်းကြ၊ ခုံကြ၊ ထင်မြင်ချက်တွေပေးကြနှင့် ကစားဝိုင်းပျက်သွားသည်။ တစ်ယောက်က ပြောသည်။ သူတို နိုင်မယ်မှန်းသိလို့ ခေါင်ထိအကုန်ယူချင်တာ။ " ရှုံးသူက မကျေနပ်၊ စိတ်ထဲက ကြိမ်းဝါးသည်မှာ " နေနှင့် ဦးပေါ့ကွာ၊ တစ်နေ့နေ့တော့ တွေ့ကြသေးတာပေါ့"။ နိုင်သူက ငြိမ်နေလိုက်သည်။ ကလေးဘ၀ ခိုအောင်းခဲ့သည့်ခံစားချက်များမှ တစ်ခုဖြစ်ပါသည်။

လူငယ်အရွယ်

ရွာစွန်ထန်းတောတွင် လူငယ်တစ်သိုက် ၀ိုင်းဖွဲ့ကာ ထန်းရည်သောက်လျက်ရှိသည်။ နံနက်စောစော အိပ်ရာထ၍နွားနှစ်ကောင်ဆွဲကာ ထွန်တုံးထမ်းရင်း လယ်ကွင်းသို့ ရောက်ခဲ့သည်။ နေမွန်းမတည့်မီ တစ်ဧကလောက်ပြီးရန် မျှော်မှန်းသည်။ ပြီးချင်သည်မှာလည်း ထယ်ထိုးပြီး၊ ထွန်တိုက်ပြီးသည်အထိ ဖြစ်သည်။ ထို့ကြောင့် နွားတစ်ရှဉ်းသာမက ကျွဲတစ်ရှဉ်းပါ ခေါ်လာခဲ့သည်။ ခုတော့ပြီးပြီ၊ လိုချင်သည့် အတိုင်းအတာလည်းဖြစ်ပြီ။ တစ်မနက်ခင်း ပင်ပန်းသမျှ ထန်းရိပ်မှာ ချွေးသိပ်ရတော့မည်။ထန်းရည်သည် ပုစွန်ဆိတ်ခုန်နေသလို ပဲကြီး လှော်ကလည်း ကြွပ်ရွလျက်ရှိသည်။

ထန်းတဲရှင် ကိုချက်ကြီးက ပင်ကျရည်လက်ကျန်ဟုဆိုကာ ထန်းအိုးနှစ်မြူ လာချသည်။ သောက်မည့်သူက လေးယောက်ဆိုတော့ အာသာပြေမည် မထင်။ ထို့ကြောင့် ကိုချက်ကြီးနှင့် အလောင်းအစား တစ်ခု လုပ်ကြသည်။ ထန်းပင်ပေါ်က ထန်းသီးကို လေးခွနှင့်ပစ်မည်။ တစ်လုံးပြုတ်ကျလျှင် တစ်အိုး၊ နှစ်လုံးပြုတ်ကျလျှင် နှစ်အိုး ပေးရမည်ဟု ကိုချက်ကြီးသဘောတူ၍ ခေါင်းပေါ်က ထန်းသီးစိမ်းများကို ရီဝေေ၀နှင့်လက်တည့်စမ်းကြသည်။ လောက် စာလုံးတစ်အိတ်သာ ကုန်သွားသည်။ ထန်းသီးတစ်လုံးမျှ ကြွေကျခြင်းမရှိ။ ထိုအခါမှကိုချက်ကြီးက ရင်တွင်းဖြစ်စကားဆိုသည်။ " ဘယ်အရာမှအလကားမရဘူး " ဟူ၍ဖြစ်သည်။

လူလတ်ပိုင်းအရွယ်

လူလတ်ပိုင်းအရွယ်တစ်စု 'Indoor game ' ဟုဆိုကဲာရိုက်ကြသည်။ ယောက်ျားတွေချည်းမဟုတ်၊ မိန်းမတွေလည်းပါသည်။ အကြမ်းအားဖြင့် အသက်(၅၀)ကျော်အရွယ်များနှင့် ပင်စင်စားများဖြစ်သည်။ ဖဲကစားနည်းမှာ တစ်ချပ်မှောက်ဖြစ်ပြီးကြေးကလည်း ကြီးသည်။ 

ကစားနည်းအရ နိုင်ပုံမပေါ်လျှင် စောစောစီးစီးဘေးထွက်၍ ရသည်။ ကံစမ်းလိုသူများက ဖဲစိတ်မွှန်၍ ငွေမျောတော့ ငွေနဲ့လိုက်ကြသည်။ တစ်ခါတစ်ရံ စိန်ကောင်း၊ ကျောက်ကောင်းရောင်းရာတွင် ဆေးရိုးသည်ကတစ်မှောင့်ဆိုသလို အောက်ပြုတ်သမားနှင့်လည်း တွေ့ရသည်။ အောင့်သီးအောင့်သက် ဖြစ်ကာ ပင့်၍ခွပ်သည်ကို ခံရပြီး စင်ပေါ်က ပြုတ်ကျသည်များလည်းရှိသည်။ ဖဲဝေပြီးသည်နှင့် မျက်နှာထားတွေ ပြောင်းကြသည်။ ဟန်ဆောင်တတ်ခြင်းသည် တစ်ချပ်မှောက်ကစားနည်းအတွက် ပညာတစ်မျိုးပင်။ ဟန်ဆောင်ကောင်းသူများကြောင့်ပါ သွားသည်လည်း ရှိသည်။

ဒီအလှည့်တော့ အပေါ်စီးကဖြစ်ကြောင်းသိသဖြင့် ခပ်ကျယ်ကျယ်လေးအော်လိုက်မိသည်။ " ရှိူး "။ ခဏငြိမ်သွားပြီး တစ်ယောက်ပြေး၍ သုံးယောက်လိုက်သည်။ သင်္ကြန်အမြောက်အထင်နှင့် မကြောက်ကြ။ အားလုံးလိုက်ပြီး၍ ဖဲလှန်ပြပြီးသာသူ စားရုံသာဖြစ်သည်။ ထိုအချိန်တွင် "ရဲတွေ လာနေပြီ" ဟုအသံထွက်လာသည်။ နိုင်သူကရှုံးသူရှေ့ရှိငွေအားလုံးလိုက်သိမ်းသည်။ဖျာအောက်မှာ သိမ်းထားသည့် ငွေစက္ကူအချို့ အစထွက်နေရာသို့ လက်ရောက်သွားသည်။ " ဖျာအောက်က မပါဘူးလေ၊ သူနဲ့မဆိုင်ဘူး။ " ရဲများရောက်ရှိချိန် ဟိတ်ဟန်ကောင်းသော ရှိူးသမားများ ပုံမပျက်။ ပြန်ချိန်တန် တော့ ရဲတွေပြန်သွားကြသည်။

လူကြီးအရွယ်

လူကြီးတစ်ဦး အာပေါင်အာရင်းသန်သန် ဖြင့် မိုက်ကရိုဖုန်းကိုင်ကာ မဲဆွယ်စကားပြောလျက် ရှိသည်။ သူပြောသည့်စကားကို အနှစ်ချုပ်လျှင် သူများမကောင်းကြောင်း၊ ကိုယ့်ကောင်းကြောင်းသာဖြစ်သည်။ ဘယ်လောက်တော်ကြောင်း၊ တတ်ကြောင်း၊ ကျွမ်းကျင်ကြောင်း၊ လျှောမွေးကိုဗာရာဏသီချဲ့လျက်ရှိသည်။ သူ့ကိုထောက်ခံသူများ လက်ခုပ်လက်ဝါးတီးပြီး အများစုက နှာခေါင်းရှုံ့ကြသည်။ သို့ရာတွင် အရှိန်မသတ်နိုင်၊ ကြုံတုန်းလုပ်ထား(လုပ်စား)ရပေမည်။ 

ဟုတ်တာမဟုတ်တာအပထားပြီး ကြမ်းပိုးကလိပ် ဖြစ်ချင်ဖြစ်မည်။ အိမ် ပြန်ရောက်လျှင် ကိုယ်ပြောခဲ့သည့်စကားများ လက်တွေ့ကျမကျ စဉ်းစားရန် လိုပေလိမ့်မည်။ လေထဲတိုက်အိမ်ဆောက်သည့် အစီအမံများသည် သူသေသည့်တိုင် အကောင်အထည်ပေါ်လာရန် အကြောင်းမမြင်ပေ။ ထိုလူကြီးသည် အတွေအကြုံများသူဖြစ်၍ အောက်သက်ကျေမည်ဟု ယူဆစရာရှိသည်။ သို့ရာတွင် သူ့ကြောင့် အောက်
သက်များ ကျေရပေါင်းမနည်းတော့ချေ။ ငါပြောသလိုလုပ်၊ ငါလုပ်သလို မလုပ်နဲ့လား၊ ငါ့မြင်းငါစိုင်း စစ်ကိုင်းရောက် ရောက်လားခွဲမရပေ။ 

သို့ရာတွင် သူ့ဆီကယူရမည့်ပညာတစ်ခုကား ခေတ်အဆက်ဆက်ကုလားထိုင်မပျောက်အောင် နေတတ်ခြင်းပင်။ လုပ်စားတော့ မိုးခေါင်၊ ခိုးစားလို့ ခွေးဟောင် မခံရသည့် လူစားမျိုးတွင် တစ်ဦးအပါအ၀င်ဖြစ်သည်။ ဒီတစ်ခါ ထိုလူကြီးနှင့်ကြုံလျှင်မေးခွန်းတစ်ခု မေးကြည့်ရပေမည်။ ကံကံ၏ အကျိုးကို ယုံသလားဟု။ လူတို့သည် မွေးဖွားပြီးနောက် ငယ်ရာမှကြီး၊ ကြီးရာမှအိုနာသေကြရသည်။ ဆရာတော် တစ်ပါးရှင်းပြဖူးသည့် ပုထုဇဉ်တို့ ကြိုတင်မသိနိုင်သော သေခြင်းနှင့်သက်ဆိုင်သည့် အရာငါးမျိုးမှာ (၁) သေမည့်အသက်အရွယ်၊ (၂) သေမည့်အနာရောဂါ၊ (၃) သေမည့်အချိန်၊ (၄) သေမည့်နေရာ၊ (၅) သေလွန်ပြီးနောက်ဖြစ်ရမည့် ဘုံဘ၀ဟူ၍ဖြစ်သည်။ သမိုင်းရေးကြသူများကိုယ်တိုင် သမိုင်းတရားခံအဖြစ် မခံသင့်ကြောင်း တွေးမိပါသည်။

ကလေးတွေကို နှိပ်စက်နေဆဲ . . . .

အမှန်မှာကျွန်မ၏ဆောင်းပါးခေါင်းစဉ်ကို " ကလေးတွေကို နှိပ်စက်လို့ အားမရကြသေးဘူးလား " ဟု ပေးချင်ပါသည်။ ထို့ထက်သင့်တော်သောခေါင်းစဉ်ကို စဉ်းစား၍မရပါ။

ရှေးက ဂျီတီအိုင်ကို အဆန်းထွင်ပြီး ဂျီတီစီဟု ပြောင်းလဲကာ မြန်မာပြည်အနှံ့ကျောင်းများဖွင့်ခဲ့ရာမှ YTU (ရန်ကုန်နည်းပညာတက္ကသိုလ်) ဟု အမည်ပေးခဲ့ပြန်သော လှိုင်သာယာဂျီတီစီကိစ္စကို ပြောရန် အရေး ကြုံနေသည်။ ပညာရေးကိစ္စများကို " အခုဆီထမင်း၊ အခု စာကလေးကြော် " လုပ်နေသည်မှာကြာပြီ။ မြေစာပင်ဖြစ်သောကလေးများမှာ လည်စင်းခံနေကြရသည်။
ယခင်က တက္ကသိုလ်ဝင်တန်းအောင်ပြီးလျှင် ဂျီတီအိုင်ဝင်ခွင့်ဖြေရ၏။ ၀င်ခွင့်အောင်လျှင် သုံးနှစ်တက်ပြီး အေဂျီတီအိုင်ဒီပလိုမာဘွဲ့ရသည်။ အငယ်တန်းအင်ဂျင်နီယာ အလုပ်ကို အစိုးရဌာနများက ခေါ်သည်။ အဆင် ပြေသည်။ ယခု ဂျီတီစီများဖြစ်လာသောအခါ နှစ်နှစ်တက်ပြီးအေဂျီတီအိုင်ဒီပလိုမာပေးသည်။ အမှတ်ကောင်းလျှင် B.Tech ခေါ် ဘွဲ့ပေးသည်။ ၎င်းမှာ အမှတ်ကောင်းလျှင် ဘီအီးတက်ရသည်။ ဤ အစီအစဉ်ကို မဝေဖန်ချင်ပါ။ အေဂျီတီအိုင်အောင်ပြီး B.Tech အမှတ်မမီလျှင် ကျောင်းထွက်ရခြင်းကို လည်း မပြောလိုပါ။ ယခုပြဿနာမှာ
အေဂျီတီအိုင်လက်မှတ် ကိစ္စဖြစ်၏။ အေဂျီတီအိုင် ဒီပလိုမာဘွဲ့ရကလေးများမှာ B.Tech အတွက် လမ်းပိတ်လိုက်သဖြင့် ဘွဲ့ရိုးရိုးတစ်ခုရဖို့အဝေးသင်တက္ကသိုလ် တက်ကြရရှာသည်။ သုံး၊ လေးနှစ် ကြာမှ အေဂျီတီအိုင်-ဘီအေ(အင်္ဂလိပ်စာ) စသဖြင့်ရကြသည်။ ထိုအချိန်မှာ သူတို့အသက်တွေ ကြီးကုန်ပြီ။ အလုပ်လျှောက်ဖို့ ခက်သည်။

ထိုကိစ္စပြောကြ၊ ဆိုကြတာများလွန်းခါမှ ယခုနှစ်ကစပြီး ဂျီတီစီတက်လျှင် တောက်လျှောက် ဘီအီးသွားနိုင်သည်ဟု လုပ်နေပြန်သည်။ Ph.D တွေပေါပေါ လောလောဖြစ်ပြီး မူလတန်းဆရာလုပ်ရသည့် နမူနာကဲ့သို့ ဘီအီးတွေပေါပြီး မူလတန်းဆရာဖြစ်လာမည့် အရေးတွေးမိ၏။ အမှန်မှာ ဂျီတီစီကို သုံးနှစ်ပဲထား ဒီပလိုမာပေး။ နောက်ဆုံးနှစ်မှာ အမှတ်ကောင်းလျှင် (ထူးချွန်လျှင်) ဘီအီးကို ကြို့ကုန်းတက္ကသိုလ်သို့ တက်ခိုင်းသောစနစ်ဖြစ်သင့်သည်။ ဤစနစ်မှာ ယခင်ကကျင့်သုံးခဲ့သော စနစ်ဖြစ်၏။ ကြို့ကုန်းမှာ တက္ကသိုလ်ဝင်တန်းအမှတ်ဖြင့် ပထမနှစ် လက်မခံဘဲ ဘီအီးတန်းများသာ ထားလျှင် နေရာထိုင်ခင်းလည်း အဆင်ပြေသည်။ အင်ဂျင်နီယာဖြစ်ချင်သူများ ဂျီတီစီကို ကောလိပ်အဆင့် တက်ခြင်းဖြင့်ပြုစုပျိုးထောင်ခြင်း ဖြစ်သည်။ ယခုတော့ ဂျီတီစီမှာလည်း ဘီအီးထားမည်။ ကြို့ကုန်းမှာက ထူးချွန်ဘီအီး ဆိုသောအခါ ကလေးတွေကိုခွဲခြားရာကျပါသည်။

ယခုပြောချင်သည့်ပြဿ နာက အေဂျီတီအိုင် ဒီပလိုမာဘွဲ့လက်မှတ်ယူသည့်ပွဲကိစ္စပါ။ ဒီပလိုမာရသူ အလွန်များသဖြင့် စာမေးပွဲအောင်ပြီး နှစ်နှစ်ခန့်ကြာမှဘွဲ့လက်မှတ်ပေးနိုင်သည်။ ဒါက ခွင့်လွှတ်၍ရပါသည်။ ခွင့်မလွှတ်နိုင်သော ကိစ္စမှာလက်မှတ်ရဖို့လျှောက်ထားရာတွင် တင်ပြရမည့် စာရွက်စာတမ်းကိစ္စဖြစ်၏။ ဘွဲ့ယူမည့်ကလေးများ တင်ပြရမည့်စာရင်းတွင် (ဆိုင်တာ၊ မဆိုင်တာ အပထားပြီး) အိမ်ထောင်စုစာရင်း၊ ရပ်ကွက်ထောက်ခံချက်၊ ရဲစခန်းထောက်ခံချက်တွေပါရသည်။ ဤအထိခွင့်လွှတ်ပါမည်။ နိုင်ငံသားဖြစ်ကြောင်း လ၀ကရုံးမှ ထောက်ခံစာယူရမည်ဆိုခြင်းကိုမူ ခွင့်မလွှတ်နိုင်ပါ။

ကလေးများလျှောက်လွှာတွင် မိခင်မှတ်ပုံတင်၊ ဖခင်မှတ်ပုံတင်၊ မိမိကိုယ်တိုင်၏ မှတ်ပုံတင်များ ပူးတွဲပါဝင် ပြီးဖြစ်သည်။ မှတ်ပုံတင်ဆိုသည်က ယခင်အခေါ်အဝေါ်ပါ။ တရားဝင်ခေါ်လျှင် " နိုင်ငံသားစိစစ်ရေးကတ် " ဖြစ်သည်။ ထိုနိုင်ငံသားစိစစ်ရေးကတ်ပြားများမိခင်၊ ဖခင်၊ ကလေးသုံးဦးစလုံးတင်ပြထားပါလျက်နှင့် လ၀ကရုံးမှနေ၍ နိုင်ငံသားဖြစ်ကြောင်း လျှောက်လွှာပုံစံ ဖြည့်ခိုင်းခြင်းကား အဆိုပါနိုင်ငံသားစိစစ်ရေး ကတ်ပြားများကို မယုံကြည်ခြင်းဟု အဓိပ္ပာယ်မရပါလား....။

အထက်ပါမှတ်ပုံတင်ကတ်ပြားများသည် လ၀ကရုံးများက တရားဝင်ထုတ်ပေးထားသော သက်သေခံ ကတ်ပြားများဖြစ်ရာ နေရာတကာ အရေးပါနေသည်။ ယခုအေဂျီတီအိုင် လက်မှတ်ကလေး ထုတ်ပေးရန်အတွက်မှာတော့ တရားဝင်ကတ်ပြားများကို အဘယ်ကြောင့်အသိအမှတ်မပြုဘဲ ထောက်ခံစာ
ထပ်တောင်းခိုင်းပါသလဲ။လှိုင်သာယာကျောင်းသို့ တစ်ခေါက်သွားရ ခြင်းမှာ လွယ်ကူသည်မဟုတ်ပါ။ ထို့ပြင် လ၀ကရုံးဆိုသည်ကိုလည်း ကျားမြီးဆွဲရသကဲ့သို့ ကြောက်ကြ ရပါသည်။ သူတို့က ၁၀ နှစ်သားရော၊ ၁၈ နှစ်သားရော၊ အပျောက်အရှများရော တစ်မြို့နယ်လုံးအတွက် လုပ်ပေးနေရသဖြင့် အမြဲတမ်း အလုပ်ရှုပ်ကြရှာပါသည်။ မလိုအပ်ဘဲနှင့်ထောက်ခံစာသွားတောင်းခြင်းမှာ အလုပ်ပိုသည်။

ပို၍ခက်သည်မှာ စာရေးများက စစ်ဆေးပေးပြီးသော်လည်း " ဦးစီးမှူး" ဆိုသူလက်မှတ်မထိုးလျှင် မပြီးပေ။ အဆိုပါဦးစီးမှူးများကလည်း ၁၁ နာရီ မှာပင် ရုံးမရောက်သေးပါ။ သူ့ခမျာများက မြို့နယ်အစည်းအဝေးများ တက်ကြရသည်။ သူ့ရုံးမှာအမြဲမထိုင်နိုင်ကြ။ သည်တော့ ရာနှင့်ချီ သော လျှောက်လွှာရှင်များ ရုံးနားမှာ ထိုင်စောင့်ပေရော့။

" နောက်ဆုံးရက်" ဆိုသော ကန့်သက်ချက်ကရှိသေးသည်။ " မရသေးဘူးလို့ပြောလိုက်" ဟု သူတို့က သင်ပေးပါသည်။ သည်လိုပြောတိုင်း ကျောင်းက လက်ခံမှာလား။စင်စစ်မှာ ကျောင်းကတောင်းခြင်းကို မှားနေသည်။ လ၀ကကို အလုပ်မပေးသင့်ပါ။ မိဘနှင့်မိမိကိုယ်တိုင်၏ နိုင်ငံသားစိစစ်ရေးကတ် ပါနေခြင်းကို မယုံကြည်ခြင်းအတွက် ဘယ်လို နားလည်ရမှန်းပင် မသိတော့ပါ။ ဟိုပြေး၊ ဒီပြေးနှင့် သူတို့ ပြောသမျှမျက်နှာငယ်ငယ်နှင့် လိုက်နာနေရသော တိုင်းပြည်၏ပညာသင်လူငယ်များ (အသက်၂၀ ပင် မပြည့်သေး) အား သည်လိုမနှိပ်စက်သင့်ပါ။ နည်းပညာတက္ကသိုလ်သည်စနစ်အမျိုးမျိုးပြောင်းလဲရုံမက မလိုအပ်ဘဲ တင်းကျပ်နေသဖြင့် ကလေးတွေကိုနှိပ်စက်လို့ အားမရသေးဘူးလား....ဟု မေးရခြင်းအတွက် မည်သူဖြေမည်နည်း။

ရေးသူ-ရွှေကူမေနှင်း

အငယ်ကလေး မွေးလာတာ ပျော်စရာကောင်းသလား

ကလေးတယောက်ကို မွေးဖွားရတယ်ဆိုတာဟာ မိခင်တယောက်အတွက် အင်မတန်မှ မလွယ်တဲ့ ကိစ္စရပ်ကြီးပါ။ သားဦးတုန်းကလည်း သားဦးမို့လို့ ဂရုစိုက်ရသလို၊ သားဦးမဟုတ်ဘဲ ဒုတိယကလေးကို မွေးဖို့ ကိုယ်ဝန်ဆောင် ရပြန်တော့လည်း ပထမကလေး အတွက်ရော၊ နောက်မွေးမယ့် ဒုတိယကလေး အတွက်ပါ စိတ်ရော ရုပ်ရော မနာကျင် မထိခိုက်ရအောင် ပြင်ဆင်ကြရ ပြန်ပါတယ်။

ပထမကလေး အတွက် မောင်လေး၊ ညီမလေး (ဒါမှမဟုတ်) ညီလေး၊ ညီမလေး တယောက်ကို မေမေက မွေးတော့မယ် ဆိုတဲ့ သတင်းစကားဟာ ပထမကလေး အတွက်တော့ တကယ့်အချိုးအကွေ့ အပြောင်းအလဲကြီး တခုပါပဲ။ ဟိုးအရင်တုန်းကတော့ အိမ်မှာ ကလေးဆိုလို့ ကိုယ်တယောက်တည်း ရှိနေခဲ့ပေမယ့် အခုတော့ နောက်ထပ် ကလေးတယောက် အိမ်မှာ တိုးလာတော့မယ်။ ဒါဟာ ကလေး တယောက်အတွက် ပျော်စရာ ဖြစ်မလား၊ နာကျင် ဝမ်းနည်းစရာ ဖြစ်မလားဆိုတာကတော့ ကလေးတို့ အနားမှာ ရှိနေကြတဲ့ အဖေ အမေ မိဘဆွေမျိုးများ အပေါ် မူတည်လို့ နေပါတယ်။

ကျမတို့ နိုင်ငံက လူကြီး တော်တော်များများဟာ နောက်ကလေး တယောက်ကို မိခင်က ကိုယ်ဝန်ဆောင်လိုက် ပြီဆိုတာနဲ့ ပထမကလေးကို မခံချင်အောင် စနောက်တတ်ကြ ပါတယ်။ “မေမေက ညီလေးကို မွေးတော့မယ်။ မင်းကို ချစ်တော့မှာ မဟုတ်ဘူး” ဆိုတာမျိုးကအစ၊ မွေးလာပြန်တော့လည်း အငယ်လေးက ပိုချောတယ်တို့၊ ပိုပြီးတော့ ထက်တဲ့ပုံ  ပေါက်တယ်နော်တို့ ဆိုတာမျိုးတွေနဲ့ အကြီးကလေးရဲ့ရှေ့မှာ နှိုင်းယှဉ်ပြောတတ် ကြပြန်ပါသေးတယ်။

လူကြီးကတော့ ဘာရယ်မဟုတ် ပြောဆိုလိုက်တာပေမယ့် ဒီလို ပြောဆိုမှုတွေကြောင့် အကြီးကလေးဟာ အငယ်ကလေး  လူ့လောကကို  မရောက်လာခင်ကတည်းက သူ့အချစ်ကို လုယူသွားတော့မယ့် ပြိုင်ဘက် တယောက်အဖြစ် စတင်ပြီးတော့ မုန်းစိတ်ဝင်လာတော့ တာပါပဲ။

သူ့မေမေရဲ့ဗိုက်ထဲမှာ ကလေးလေးတယောက် ရောက်နေပြီ ဆိုတဲ့စကားဟာ အရင်ရှိနေပြီးသား အကြီးကလေး အတွက် ခံစားချက် အမျိုးမျိုးကို ဖြစ်စေပါတယ်။ ဘာကြောင့်လဲ ဆိုတော့ သူ့အတွက် အပြောင်းလဲ ကြီးတခုကို သူ့ အရွယ်လေးနဲ့  ကြုံရတော့မှာမို့ ပါ။ ဒီအပြောင်းလဲကြီးဟာ ကလေး တယောက်အတွက် သိပ်ကိုမှ အရေးကြီးတဲ့ အပြောင်းအလဲကြီးပါပဲ။ ကလေးရဲ့ စိတ်ပိုင်းဆိုင်ရာကို မနာကျင်၊ မထိခိုက်စေဘဲနဲ့ ညင်ညင်သာသာ ပျော်ပျော်ရွှင်ရွှင် ပြောင်းလဲနိုင် စေဖို့ သိပ်ကို အရေးကြီးလှ ပါတယ်။

တကယ်တော့  ကလေး အသစ်တယောက် ရောက်ရှိလာမယ့်  ကိစ္စဟာ  အရင်ရှိနှင့်ပြီးသား သားကြီး (သို့မဟုတ်) သမီးကြီးအတွက် မမွေးခင် ကတည်းကိုက အင်မတန်မှ စိတ်လှုပ်ရှားစရာ ကောင်းတဲ့ ကိစ္စရပ်ကြီးပါ။ မေမေ့ ဝမ်းဗိုက်ကြီး တဖြည်းဖြည်း ပူပြီး ဖောင်းလာတာက အစ၊ ဗိုက်ထဲက ကလေးလေးဟာ ညီမလေးလား ညီလေးလား၊ မွေးလာရင် ဘယ်လိုပုံစံလေး ဖြစ်မှာလဲ၊ အသားလေးရော ဖြူမှာလား စသဖြင့် သူ့အတွက် တွေးစရာတွေက အများကြီးပါပဲ။

ကလေးလေးမွေးရင် နာမည် ဘယ်လိုပေးမယ်၊ သူနဲ့အတူတူ ဘာတွေကိုအတူ လုပ်ပြီးတော့ ဘယ်လိုတွေ ကစားကြမယ် စသဖြင့် မွေးလာမယ့် ကလေးအတွက် စိတ်ကူးယဉ်စရာတွေလည်း အများကြီးပါပဲ။

ဒါပေမယ့် အဲဒီကလေးတို့ရဲ့ စ်ိတ်ကူးယဉ်မှုဟာ ဗိုက်ထဲကကလေး အပြင်ကို ရောက်ပြီဆိုတာနဲ့ သူတို့ မျှော်မှန်း ထားသလို ဖြစ်မလာတော့ပါဘူး။  ညဘက် တကျီကျီနဲ့ နားပူအောင် ငိုလွန်းတဲ့ ကလေးနားမှာ တအိမ်လုံးက ဝိုင်းနေတာမို့ သူ့ကို ဂရုစိုက်မယ့်သူ တယောက်မှ မရှိတော့ဘူးလို့ အကြီးကလေးက ခံစားရပါတော့တယ်။

အရင်တုန်းက သူ့အနားမှာ စာအုပ်ဖတ်ပြ၊ ပုံပြောပြနေကျ အမေကလည်း ကလေးအငယ်လေးနဲ့ အလုပ်ရှုပ် လို့။ ဟိုးအရင်က အိမ်ကိုလာရင် သူ့ကိုပဲ အရေးတယူ လုပ်နေတတ်ကြတဲ့ ဧည့်သည်တွေကလည်း မွေးစ နီတာရဲကလေး ကိုပဲ အရေးတယူ လုပ်နေကြပါတော့တယ်။ အိမ်မှာ သူရှိနေသလား၊ မရှိနေဘူးလား ဆိုတာကို တောင်မှ ဘယ်သူမှ သတိမပြုမိကြ တော့ပါဘူး။

ကလေးမွေးလာရင် အတူတူကစားမယ်၊ ဆော့မယ်လို့ သူစိတ်ကူးယဉ်ထားခဲ့ ပေမယ့်လည်း တကယ်မွေးလာတဲ့ အချိန် မှာတော့ ကလေးက အနှီးထုပ်ကွေးလေး ထဲမှာမို့ သူနဲ့ မကစားနိုင်၊ မဆော့နိုင်သေးပါဘူး။

အဲဒီထက် ပိုဆိုးတာကတော့ ဟိုးအရင်တုန်းကလိုမျိုး အိမ်မှာ လွတ်လွတ်လပ်လပ် မဆော့မကစား နိုင်တော့ တာပါပဲ။ နီတာရဲကလေး အိပ်နေတုန်း တခုခု ဆူညံမိလို့ ရှိရင် လူကြီးတွေက သူ့ကို အပြစ်တင် ဆူပူကြပါတော့တယ်။ ဟိုးအရင်တုန်းက လိုမျိုး မေမေ့နားကိုလည်း ကပ်ခွင့် မရှိတော့ဘူး။ ခုတင်ပေါ်ကို ခုန်တက်လိုက်၊ ခုန်ချလိုက်နဲ့လည်း လုပ်လို့ မရတော့ဘူး။

ဒီလိုနဲ့ အသစ်မွေးလာတဲ့ ညီလေး (သို့မဟုတ်) ညီမလေးဟာ အကြီးကလေးအတွက် အင်မတန် စိတ်ပျက်စရာ ကောင်းတဲ့ သတ္တဝါကလေး ဖြစ်လို့လာပါ တော့တယ်။

မွေးကာစကလေး အသေးလေးကို တအိမ်လုံး ဝိုင်းပြီးတော့ ဂရုစိုက်ကြ၊ အိမ်မှာ ရှိနေတဲ့ လူကြီးတွေ အားလုံး ဝမ်းသာပျော်ရွှင်နေကြတဲ့အချိန်မှာ အကြီး ကလေးရော ပျော်နေသလား၊ ဒါမှမဟုတ် ဝမ်းနည်း နေသလား၊ စိတ်ထဲမှာ အထီးကျန် ခံစားနေရသလား ဆိုတာကို မိဘဆွေမျိုးများ ဘယ်သူမှ သတိမပြုကြပါဘူး။

အကြီး ကလေးအတွက်ကတော့ အနှီးထုပ်ထဲက ကလေးလေးဟာ အရင်က သူရရှိနေကျ အချစ်၊ သူ့ရဲ့ လွတ်လပ်မှု၊ သူ့ရဲ့ ပျော်ရွှင်မှုတွေကို လုယူသွားသူ လို့ ခံစားနေရပါပြီ။  ဒီခံစားမှုကို ပြသတဲ့အနေနဲ့  အကြီးကလေးလေးဟာ မွေးစကလေးကို  ဆိတ်ဆွဲတာမျိုး၊ လူကြီးလစ်ရင် လစ်သလို ဆွဲကုတ်ဖဲ့တာမျိုး တွေကို လုပ်လာပါတော့တယ်။

အဲဒီ အခါမှာတော့ ကလေးအနားမှာ ရှိနေတဲ့ မိဘဆွေမျိုးများက ကလေးရင်ထဲမှာ ဘာတွေဖြစ်နေလဲ၊ ဘာကြောင့် ဒီလိုဆိုး လာရတာလဲ ဆိုတာကို မဆန်းစစ်တော့ဘဲနဲ့ အကြီး ကလေးကို ဆိုးလာတယ်တို့၊ အကြီးက အငယ်ကို မညှာဘူးတို့၊ အင်မတန်ဆိုးတဲ့ အကောင်တို့ စသဖြင့် အလွယ်တကူနဲ့ တံဆိပ်ကပ်လိုက်ကြ ပါတော့တယ်။

အကြီးပဲ အငယ်ကို ညှာရမယ်တို့၊ လူကြီးတွေက ဒီလောက် အလုပ်ရှုပ်နေတာကို သူက နားမလည်ဘူးတို့ ကလေးကို ပြောတဲ့ အချိန်မှာ အကြီးကလေးဟာလည်း ကလေးပဲရှိသေးတယ် ဆိုတာကိုတော့ လူကြီးများ မေ့နေကြပါတယ်။

သူဟာလည်း ကလေးပဲမို့ လူကြီးတွေ ဘယ်လောက် အလုပ်ရှုပ်နေသလဲ ဆိုတာတွေ၊ အကြီးက အငယ်ကို ညှာတာ ရမယ့် ကျင့်ဝတ် ကိစ္စတွေကို သူ့အနေနဲ့ ဘယ်လိုမှ နားလည်နိုင်ဖို့ မလွယ်သေးပါဘူး။ နားမလည်နိုင်သေးတဲ့ ကလေးကို နားမလည်ရကောင်းလား ဆိုပြီးတော့ ပြစ်တင် ဆူပူတာဟာ  ကလေးဆီကနေ  မဖြစ်နိုင်တာကို တောင်းဆိုနေတာ ပါပဲ။

အဲဒီ အချိန်မျိုးမှာ ကလေးမွေးပြီးစ အမေ့ခမျာ မှာလည်း  မွေးစကလေးနဲ့ အလုပ်ရှုပ်တာ၊ ဟော်မုန်း အပြောင်း အလဲကြောင့် စိတ်ဓာတ်ကျတာ၊ အိပ်ရေးပျက်ရလို့ စိတ်ညစ်ရတာတွေကြောင့် ကလေးအကြီးလေးကို  ဟိုးအရင် တုန်းက လိုမျိုး  ဂရုစိုက်နိုင်ဖို့ မလွယ်တော့ပါဘူး။ အဲဒီလို အချိန်မျိုးမှာ အကြီး ကလေးအတွက် အမေ့ ကိုယ်စား နွေးနွေးထွေးထွေးနဲ့ ကြင်နာပေးနိုင်မယ့် ရင်ခွင် လိုလာပါပြီ။

အဖေ (သို့မဟုတ်) ဆွေမျိုး  သားချင်းတယောက်ယောက်က အကြီးကလေးနဲ့ အတူတူ ဆော့ပေးတာမျိုး၊   အကြီး ကလေး ပြောချင်တာ လေးတွေကို စိတ်ဝင်တစားနဲ့ နားထောင်ပေးတာ မျိုးလေးတွေ လုပ်ပေးမယ် ဆိုရင်ဖြင့် အမေ့နား မကပ်ရလို့ ဝမ်းနည်းနေရှာတဲ့  အကြီးကလေးရဲ့ ခံစားချက်တွေ လျော့နည်းသွားမှာပါပဲ။

ကလေးအကြီး တော်တော်များများဟာ အငယ်လေး မွေးတဲ့အချိန်မှာ သူတို့ ကိုယ်တိုင်လည်း အငယ်လေးလိုမျိုး ကလေး ပြန်လုပ်ပြီးတော့ မေမေ့ အနားကို ကပ်ချင်ကြပါတယ်။ အဲဒီအခါမျိုးမှာ မေမေက “ဒီမှာ မအားဘူး၊ လာမရှုပ်နဲ့” လို့ အော်ထုတ်မယ် ဆိုရင်ဖြင့် သူတို့ခမျာ သိပ်ကိုမှ ဝမ်းနည်း အထီးကျန် ခံစားသွားရမှာပါ။ ဒီလို ဝမ်းနည်း အထီးကျန် ခံစားမှုကနေ “မေမေက ငါ့ကို မချစ်တော့ဘူး၊ ညီလေးကိုပဲ ချစ်တော့တယ်” လို့ တွေးလာ တတ်ပါတယ်။

မေမေက အငယ်လေးနဲ့ အလုပ်ရှုပ်နေတယ် ဆိုပေမယ့်လည်း အငယ်လေးကို နို့တိုက်ရင်းနဲ့ပဲ အကြီးလေးကို ပုံပြောပြတာမျိုး၊ အကြီးလေးနဲ့ စကားထာဝှက်တမ်း ကစားတာမျိုး၊ အကြီးကလေး ပြောချင်တဲ့ စကားတချို့ကို စိတ်ပါ လက်ပါနဲ့ နား ထောင်တာမျိုးတွေကို လုပ်ပေးလို့ ရတာပါပဲ။

ညီလေးက ကလေးသေးသေးလေးမို့ ညီလေးကို အများကြီး ဂရုစိုက်ဖို့လိုတယ် ဆိုတဲ့အကြောင်း၊ သူ ငယ်ငယ်တုန်းက လည်း ဒီလိုပဲ ဂရုစိုက်ခဲ့ရတယ် ဆိုတဲ့ အကြောင်းတွေကို  မေမေက အကြီးကလေးကို ပြောပြပေးဖို့ လိုပါတယ်။ အထူးသဖြင့် အိမ်သားများ အနေနဲ့ အငယ်လေးက ချစ်ဖို့ ကောင်းလိုက်တာလို့ ပြောမယ့်အစား အငယ်လေးက ချစ်ဖို့ ကောင်းလိုက်တာ သားကြီးငယ်ငယ်တုန်းကလိုပဲ၊ သားကြီးလည်း အဲလိုမျိုးလေးပဲ သိပ် ချစ်ဖို့ကောင်းတာ ဆိုတာမျိုးကို ပြောပေးရပါမယ်။

ဒါဆိုရင်ဖြင့် အငယ်လေးမွေးလာတဲ့ အချိန်မှာ အကြီးကလေးတို့ ခံစားရတဲ့ စိတ်ပိုင်းဆိုင်ရာ ခံစားချက်တွေ လျော့နည်းသွားမှာ ပါပဲ။ ကလေးတို့ရဲ့ ငယ်ဘဝဟာ အင်မတန်မှ အရေးကြီးပါတယ်။ ငယ်ဘဝမှာ ပျော်ရွှင်ဖို့၊ စိတ်ဒဏ်ရာတွေမရဖို့ လိုပါ တယ်။

အမေ့ ရင်ခွင်ထဲကို အချိန်မရွေး တိုးဝင်လို့ ရနေရာကနေ အဲဒီနေရာကို ဖယ်ပေးလိုက်ရတဲ့ ခံစားချက်ဟာ ကလေး တယောက် အတွက်ကတော့ အင်မတန်မှ ပြင်းထန်တဲ့ အပြောင်းအလဲကြီး တခုပါ။ ဒီအပြောင်းလဲကြီးကို ညင်ညင် သာသာနဲ့ ကူး ပြောင်းနိုင်အောင်လို့ ကလေးနားက လူကြီးမိဘများ အနေနဲ့ လုပ်ပေးနိုင်မယ် ဆိုရင်ဖြင့် ညီလေး မွေးတာ သိပ်ပျော်စရာ ကောင်းတာပဲ၊ ညီမလေးမွေးလာတာ ပျော်ဖို့ကောင်းလိုက်တာ လို့ ကလေးတို့ ခံစားကြရပြီး ညီအစ်ကို မောင်နှမကြား ချစ်ခင်တွယ်တာမှု တွေလည်း ပိုပြီး ရရှိခိုင်မြဲလာမှာ အမှန်ပါပဲ။     ။

ခေတ်ဘုန်းသစ်