သားသား မီးမီးကြီးရင် ဘာလုပ်မယ်

တနေ့က ကျမ မိတ်ဆွေ တယောက် အိမ်ကို အလည်ရောက်ပါတယ်။ သူနဲ့ အတူ သူ့ရဲ့ သမီးလေးလည်း ပါပါတယ်။ သူ့ရဲ့ သမီးလေးက အသက် ၁၂ နှစ်အရွယ်လောက်ပါ။ မိတ်ဆွေက သူ့ရဲ့ သမီးကလေး အကြောင်း ပြောပြပါတယ်။

သမီးလေးက မူကြိုကျောင်းကို မတက်ခဲ့ဖူးတဲ့ အကြောင်း၊ မူကြို ထားတုန်းက တရက်ပဲ တက်ပြီးတော့ ငိုပြီး ပြန်လာ တယ် ဆိုတဲ့ အကြောင်း၊ ပြီးတော့ ကလေးက “အမေတို့ ဖြစ်ချင်တဲ့ ဆရာဝန်ကြီး ဖြစ်အောင်လို့ ကျောင်းနေရင် သမီး စာကြိုးစား ပါ့မယ်၊ မူကြိုတော့ မထားပါနဲ့” လို့ပြောခဲ့တဲ့ အကြောင်း၊ သူ့သမီး ဆရာဝန်မကြီး ဖြစ်လာအောင်လို့ ဘယ်လို ဘယ်လိုတွေ ကလေးကို တွန်းအား ပေးပြီးတော့ စာကျက်ခိုင်းတယ် ဆိုတဲ့ အကြောင်း၊ အတန်းထဲမှာ သူ့သမီးက အမြဲပဲ ပထမ နေရာက မဆင်းဘူး ဆိုတဲ့ အကြောင်း စသဖြင့် ကျမကို ပြောပြ ပါတယ်။

သူ့စကားကို ကျမနားထောင်ပြီးတဲ့ အချိန်မှာတော့ ကျမက ကလေးကို သမီးက ဆရာဝန် ဖြစ်ချင်တာလား ဆိုတော့  ကလေးက ခေါင်းငြိမ့်ပြ ပါတယ်။ သမီးက ကျန်တာရော ဘာတွေ ၀ါသနာ ပါသေးလဲလို့ ကျမက ကလေးကို ထပ်မေးတဲ့ အခါမှာတော့ ကလေးက ကျမမေးခွန်းကို ဘာမေးမှန်း မသိရှာပါဘူး။ မျက်လုံးလေး ပြူးပြီးတော့ ကြည့်ပါတယ်။ ဒါနဲ့ ကျမက ထပ်မေးပါတယ်။

“သမီးက ဘာဝါသနာပါသေးလဲ လို့ အန်တီက မေးတာပါ။ ဥပမာ- စာအုပ်ဖတ်တာ၊ ပုံဆွဲတာ၊ သီချင်းဆိုတာ စသဖြင့် ပေါ့” လို့ ကျမက ပြောလိုက်ရော ကလေးမလေး ရဲ့ မျက်နှာက ပိုပြီးတော့ စိတ်ရှုတ်ထွေး သွားပုံ ပေါ်လာပါတော့ တယ်။ ပြီးတော့ အသံ တိုးတိုးလေးနဲ့ “သမီးက ကြီးရင် ဆရာဝန်မကြီး ဖြစ်အောင်လို့ စာတွေ အများကြီး ကျက်နေတာ ပါ” လို့ ပြန်ဖြေ ပါတယ်။

သူ့ အမေကတော့ သူ့သမီးရဲ့ အဖြေကို အင်မတန်မှ သဘောကျတဲ့ ဟန်နဲ့ တပြုံးပြုံး ဖြစ်နေပေမယ့်  ကျမကတော့ မပြုံးနိုင်တော့ ပါဘူး။ ကလေးရဲ့ အနာဂတ် အတွက် တော်တော်လေးကိုမှ စိတ်ထဲ မောမိတာ ဖြစ်သလို ဒီကလေးလို တခြား ကလေးမျိုးတွေ အတွက်လည်း ရင်မောသွားပါတော့တယ်။ ဆရာဝန် ဖြစ်အောင်လို့ စာတွေ အများကြီး ကျက်နေတယ် ဆိုတဲ့ စကားဟာ ရုတ်တရက် ကြည့်မယ် ဆိုရင်တော့ဖြင့် ၀မ်းသာ ဂုဏ်ယူဖွယ် ကောင်းတဲ့ စကားပါပဲ။

ဒါပေမယ့် ဒီ စာတွေ အများကြီး ကျက်နေတယ် ဆိုတဲ့ နောက်မှာ ကလေးတယောက် (လူတယောက် ) အတွက် လိုအပ်တဲ့ စိတ်ကူးစိတ်သန်း ဖွံ့ဖြိုးမှု စွမ်းရည်၊ တီထွင်ဖန်တီးမှု စွမ်းရည်၊ တွေးခေါ်မှု စွမ်းရည်၊ ကိုယ်လက်ကြံ့ခိုင် ဖွံ့ဖြိုးမှု စွမ်းရည် စတဲ့ စွမ်းရည်တွေ တခုမှ မပါလာတော့ ပါဘူး။ မိဘတွေကလည်း ကိုယ့်ကလေး ဘက်စုံစွမ်းရည် ဖွံ့ဖြိုးဖို့ လိုတယ်ဆိုတာ မသိမြင်မိကြတာလည်း တွေ့ရပါတယ်။

ပြီးတော့ “သမီး ကြီးရင် ဆရာဝန်မကြီး ဖြစ်အောင်လုပ်နော်”  ဆိုတဲ့ စကားက အခုမှ ခေတ်စားတဲ့ စကား မဟုတ် ပါဘူး။ လွန်ခဲ့တဲ့ နှစ်ပေါင်း သုံးလေးဆယ်လောက် ကတည်းက ကျမတို့ နိုင်ငံမှာ အင်မတန် ခေတ်စား ခဲ့တဲ့ စကားပါ။ ဆရာဝန်လိုင်း ၊ အင်ဂျင်နီယာလိုင်း ဆိုတာတွေကို ဆယ်တန်း ရမှတ် အလိုက် အနည်းအများ စခွဲကတည်းကိုက ခေတ်စား လာခဲ့တဲ့ စကားပါပဲ။

ဒီလိုင်းတွေက အမှတ်များဆုံး ရတဲ့သူတွေသာ တက်ခွင့်ရတာမို့ ဒီလိုင်းတွေကို ရတဲ့ သူတွေက လူတော်တွေလို့ ယေဘူယျ အားဖြင့် ခေါ်လို့ရပါတယ်။ တခြားဘာသာရပ်တွေ ဖြစ်တဲ့ ၀ိဇ္ဇာ၊ သိပ္ပံဘာသာရပ်များ ကိုတော့ မိဘများက အားမပေးကြ သလို၊ ကျောင်းသားများ ကလည်း အမှတ်မီတဲ့ ဘာသာရပ်တွဲကိုသာ ယူလိုက်ရတာမို့လို့ ဘာသာရပ် အပေါ်မှာ အထင်ကြီးစိတ်နဲ့ စိတ်ဝင်စားစိတ် နည်းကြပါတယ်။

ကျမတို့ တိုင်းပြည်မှာက ငယ်စဉ် ကတည်းက ၀ိဇ္ဇာဘာသာတွဲ၊ သိပ္ပံဘာသာတွဲ များကို ကလေးတို့ စိတ်ဝင်စား လာအောင်လို့ အခြေခံပညာ ကျောင်းများက သင်ကြား မပေးနိုင်ခဲ့ပါဘူး။ ဒါကျက် ဒါဖြေ ပညာရေး စနစ်အောက်မှာ ကလေးတို့ဟာ ကျက်ပြီးသာ ဖြေနေရတာမို့လို့ ဘာသာရပ်တွေ ကိုသင်ကြားတဲ့ အခါမှာ ကလေးတို့ ရင်ထဲက စူးစမ်းလို စိတ်၊ သိချင်စိတ်တွေကို ပညာရေးက  နှိုးဆွ မပေးနိုင်ခဲ့ပါဘူး။

ဒါကြောင့်မို့လို့ ကျမတို့ နိုင်ငံမှာ သမီးကတော့ သမိုင်းဘာသာကို ၀ါသနာပါတယ်။ သင်္ချာ ၀ါသနာပါတယ် ။ သင်္ချာတို့ သမိုင်းတို့ ၀ါသနာပါတာမို့လို့ ကြီးရင် ဒီဘာသာ တွဲတွေ အကြောင်းကို ခြေခြေမြစ်မြစ် သိအောင်လို့ ဆက်လေ့လာမယ် ဆိုတဲ့ စိတ်ကူးမျိုးကို ကျောင်းသား အများစု ဆီမှာ မရှိကြတာ များပါတယ်။

ဘာသာရပ် တခုခု ပေါ်မှာ ထူးထူးခြားခြား ၀ါသနာပါတဲ့ ကလေးမျိုးတွေ ကျပြန်တော့လည်း မိသားစု အသိုင်းဝိုင်းရဲ့ အားမပေးမှု၊ တက္ကသိုလ် ကျောင်းများရဲ့ စာတွေ့၊ လက်တွေ့ ပြည့်စုံ လုံလောက်အောင် သင်မပေးနိုင်မှု၊ စာအုပ်စာတမ်း ရှားပါးမှုတို့ အောက်မှာ စိတ်ကူးတွေ၊ ရည်မှန်းချက်တွေ ပျောက်သွား ရပြန်ပါ တော့တယ်။ ဒီလိုနဲ့ပဲ ၀ိဇ္ဇာ၊ သိပ္ပံ ဘာသာ ရပ်များဟာ ဘွဲ့တဘွဲ့ မြန်မြန်ရအောင်လို့ တက်ရတဲ့ နာမည်တပ် ဘာသာရပ်များသာ ဖြစ်ပါတယ်။

ကျမတို့ ငယ်ငယ်တုန်း ကတော့ ကျမအပါဝင် ကျမရဲ့ သူငယ်ချင်းများ ဟာလည်း ဒါကျက်ဒါဖြေ အခြေခံပညာရေး နဲ့ပဲ ကြီးပြင်း ခဲ့ရတာမို့လို့ ကျောင်းသင်ခန်းစာ ဘာသာရပ်များပေါ်မှာ အခုခေတ်ကလေးများ လိုပဲ စိတ် မ၀င်စားခဲ့ကြ ပါဘူး။ ဒါပေမယ့် တခြား အပြင်ဝါသနာများ ဖြစ်တဲ့ စာဖတ်တာ၊ ပုံဆွဲတာ၊ တူရိယာ တီးခတ်တာ၊ ဘောလုံးကန်တာ၊ စစ်တုရင်ထိုးတာ စတဲ့ အရာများကို စိတ်ဝင်တစားနဲ့ လုပ်ဖို့ ၀ါသနာပါကြ ပါတယ်။

ဘာကြောင့်လဲ ဆိုတော့ ကျမတို့ ငယ်ငယ်တုံးက နည်းပညာလည်း သိပ်မထွန်းကား သေးတဲ့ အချိန်မို့လို့ ကစားစရာ အီလက်ထရောနစ် ဂိမ်းမျိုးစုံလည်း မပေါ်သေးပါဘူး။ ဒါ့အပြင် ကျူရှင်ဆိုတာလည်း အခုခေတ် ကလေးတွေလိုမျိုး ကျောင်းကျူရှင်၊ အပြင်ကျူရှင် စတာတွေကို အလုယက် တတ်နေရတာ မဟုတ်သလို၊ အစိုးရစစ် မဟုတ်တဲ့ ကျောင်းအတန်းတွေမှာ ကျူရှင်တတ်စရာ မလိုတာမို့လို့  ကျမတို့ မတတ်ခဲ့ ရပါဘူး။

ဒါကြောင့် ကျမတို့ဟာ အားလပ်တဲ့ အချိန်တွေမှာ ကိုယ် ဘာကို စိတ်ဝင်စားသလဲ၊ ဘာလုပ် ချင်သလဲ ဆိုတာကို ကိုယ့်ဘာသာကို ပြန်စူးစမ်းနိုင်တဲ့ အခွင့်ရေး ရခဲ့ပါတယ်။ စာအုပ်လေးတွေ ဖတ်ရင်းနဲ့ စာဖတ်ဝါသနာ ပါခဲ့ကြတယ်။ ပုံလေးတွေကို ဆွဲရင်းနဲ့ ပုံဆွဲဝါသနာ ပါခဲ့ကြတယ်။ စစ်တုရင် ထိုးရင်းနဲ့ စစ်တုရင် ၀ါသနာ ပါခဲ့ကြတယ်။

ဒီဝါသနာများဟာ တကယ်တော့ တလွဲပညာရေးကြောင့် ညှိုးခြောက်နေတဲ့ ကလေးတို့ရဲ့ စိတ်သစ်ပင်ကို ရေအေးအေး အားဆေး လောင်းပေးလိုက်သလို ပါပဲ။ ကျမတို့ရဲ့ ကျက်ဖြေ ပညာရေး ကြီးကြောင့် တွေးခေါ်မှု ဉာဏ်ရည် နိမ့်ပါးစ ပြုလာတဲ့ ကျမတို့ရဲ့ ဦးနှောက်တွေကို  ပြန်ရှင်သန် လာစေခဲ့ပါတယ်။ ကျမတို့ဟာ စာတွေ ဖတ်ရင်း၊ ပုံတွေ ဆွဲရင်း၊နဲ့  တွေးတတ်လာတယ်၊  စိတ်ကူးစိတ်သန်း နဲ့ တီထွင်မှု စွမ်းရည်တွေ ထက်မြတ်လာခဲ့ ပါတယ်။ မှန်တာနဲ့ မှားတာ၊ တရားတာနဲ့ မတရားတာ ကို သိမြင်လာခဲ့ကြ ပါတယ်။ ဘယ်လောက်ပဲ ပညာရေးက ကျမတို့ ဦးနှောက်တွေကို ဖျက်ဆီးခဲ့ ဖျက်စီးခဲ့၊ ကျမတို့ဟာ ကောင်းမွန်တဲ့ ၀ါသနာ နဲ့ ကျမတို့ရဲ့ ဦးနှောက်ကို မပျက်စီးအောင်လို့ ကာကွယ်ပေးနိုင်ခဲ့ပါတယ်။

အခု ဒီဘက်ခေတ်မှာတော့ ကလေးတို့ ဆော့ကစားစရာ အီလက်ထရောနစ် ဂိမ်းတွေ များစွာပေါ်လာ သလို၊ ကလေးများဟာ မူလတန်းအရွယ်လောက်မှာ ကတည်းကိုက ကျူရှင်ရယ်၊ကျောင်းရယ်၊ ကျုရှင်က ပေးတဲ့ အိမ်စာ၊ ကျောင်းကပေးတဲ့ အိမ်စာရယ် ဒါတွေနဲ့ပဲ အချိန်ကုန်ကြရ ပါတော့တယ်။  အပြင်စာဖတ်ဖို့၊ ဆေးရောင်စုံနဲ့ ပန်းချီတွေ ဆွဲဖို့ စတဲ့  အရာလေးတွေကို လုပ်ဖို့ အတွက် ကလေး တော်တော်များများမှာ ကိုယ်ပိုင် အားလပ်ချိန်ရယ်လို့ မရှိတော့ ပါဘူး။  ဒီလို ကလေးတွေ အတွက် အားလပ်ချိန် မရှိခြင်းရဲ့ အကျိုးဆက်က ကိုယ်တိုင် ဘာကို ၀ါသနာပါမှန်း၊ ဘာကို လုပ်ချင်မှန်း မသိတော့တဲ့ အပြင် ဘယ်လို အရာကို စိတ်ဝင်စားသလဲ ဆိုတာ မသိတဲ့ လူကြီးများ ဖြစ်လာကြတော့ တာပါပဲ။

စာဖတ်ဖို့၊ တွေးတော စဉ်းစားဖို့၊ တီထွင် ဖန်တီးဖို့၊ ကိုယ်လက် အားကစားလှုပ်ရှားဖို့  ၀ါသနာ မပါလာတဲ့ (ကလေးများ ဟာ ) တချိန်မှာ လူကြီးတွေ ဖြစ်လာကြတဲ့ အခါ သူတို့ ဟာ ဆရာဝန်ပဲ ဖြစ်လာဖြစ်လာ၊ အင်ဂျင်နီယာပဲ ဖြစ်လာ ဖြစ်လာ ၊ ကျောင်းဆရာပဲ ဖြစ်လာ ဖြစ်လာ သူ့ကိုယ်သူ အတွက်ရော၊ လူ့အဖွဲ့စည်း အတွက်ပါ အန္တရာယ် ရှိလာပါပြီ။

စာမဖတ်တဲ့၊ တွေးခေါ်ဝေဖန် မစဉ်းစားတတ်တဲ့၊ စိတ်ကျန်းမာရေး၊ ရုပ်ကျန်းမာရေး မပြည့်စုံတဲ့  ကျောင်းဆရာတွေ လက်ထဲ၊ ဆရာဝန်တွေ လက်ထဲ၊ အင်ဂျင်နီယာတွေ လက်ထဲမှာ အသက်များစွာ၊ ဘ၀များစွာကို ပေးထားရတာမို့လို့ နောက်ထပ် နောက်ထပ် မျိုးဆက်များ အတွက်လည်း အန္တရာယ်ပါပဲ။

ဒီအန္တရာယ်ကြီးကို ကျမတို့ တားဆီးဖို့ လိုပါပြီ။ ကလေးတို့ကို ဆရာဝန် ဖြစ်အောင်လို့  စာတွေ အကျက်ခိုင်းတာ၊ အမှတ်တွေ အများကြီးရအောင်လို့ ကျောင်းစာကျက်၊ ကျူရှင်စာကျက်၊ ဂိုက်နဲ့ စာကျက် စတာတွေကို မအားလပ် အောင် လုပ်ခိုင်း နေကြတာတွေဟာ တကယ်တော့ ကလေးရဲ့ ဦးနှောက်တွေကို ဖျက်ဆီးပစ် နေတာပါပဲ။

ကလေး တယောက်ချင်းစီဟာ အနာဂတ်နိုင်ငံတော် အတွက် အင်မတန်မှ အရေးကြီးတဲ့ လူကြီးတွေ ဖြစ်ပါတယ်။ ဒါကြောင့် ဒါကျက်ဒါဖြေ စာမေးပွဲကြီး အတွက် ကလေးတို့ကို စာလည်း ကျက်ခိုင်းသလို၊ ကလေးတို့ရဲ့ ဦးနှောက် အတွက် အင်မတန် အရေးကြီးတဲ့ လေ့ကျင့်ခန်းများ ဖြစ်တဲ့ အပြင်စာ ဖတ်ခိုင်းတာ၊ တူရိယာ ပစ္စည်းတခုခုကို တီးမှုတ် နားထောင်တာ၊ ပုံဆွဲတာ၊ ရေကူးတာ၊ အားကစား လေ့ကျင့်တာ စတဲ့ အလုပ်များ ကိုလည်း ကလေးတို့ ၀ါသနာလေး ပါလာဖို့ အတွက် အလေ့ကျင့်လေး ရအောင်လို့ လုပ်ခိုင်းပါဦး လို့ မိဘများကို အကြံပြုတိုက်တွန်းလိုက်ပါတယ်။     ။

ခေတ်ဘုန်းသစ်

ဧရာဝတီ Blog

ချစ်ရာရောက်ပါရဲ့လား

မနက်မိုးလင်းပါပြီ။ ကျမအိမ်ရှေ့ကနေ ကြည့်လိုက်မယ် ဆိုရင် ကျောင်းသားမိဘတို့ ကလေးကို ကျောင်းလိုက်ပို့ ကြတဲ့ မြင်ကွင်းကို အထင်းသား မြင်နေရပါတယ်။ ကျောပိုးအိတ်ကြီးက တဖက်၊ စားစရာ ထည့်ထားတဲ့ ခြင်းတောင်းကို ကိုင်ထားတဲ့ လက်က တဖက် နဲ့ မနိုင်မနင်း ဖြစ်နေသူကတော့ အမေပါ။ အမေ့ဘေးကနေ လိုက်ပါလာတဲ့ ရှစ်နှစ်၊ ကိုးနှစ် အရွယ် ကလေး ကတော့  လက်ထဲမှာ ဘာမှ မကိုင်ဘဲနဲ့ အမေ့ ဘေးကနေ လျှောက်လာ ကြပါတယ်။

ဒီမြင်ကွင်းကို မြင်ရတဲ့ အခါမှာတော့ ကျမတို့ နိုင်ငံက မိဘများရဲ့ သားသမီးကို အနစ်နာခံနိုင်မှု ချစ်ခင်နိုင်မှုကို လေးစားမိပါတယ်။ ကျမတို့ ၀န်းကျင်မှာ ကလေးတို့ကို ဘာတခုမှ လုပ်ခွင့် ကိုင်ခွင့် မပေးဘဲနဲ့ နေရာတကာ လိုက်လုပ် ပေးတတ်ကြတဲ့ မိဘတွေကို နေရာတိုင်း လိုလိုမှာပဲ ကျမတို့  မြင်တွေ့ နေကြရမြဲပါ။ အသက် ခြောက်နှစ်၊  ခုနှစ် အရွယ်လောက် ကြီးကို ထမင်းခွံ့ကျွေးတဲ့ မိဘတွေ၊ ကိုးနှစ် ဆယ်နှစ်လောက် အထိ ရေကို ကိုယ်တိုင် လိုက်ချိုးပေး နေတဲ့ မိဘတွေကို ကျမတို့ဝန်းကျင်မှာ တွေ့နေရ တတ်သလို၊  မူလတန်းကျောင်း၊ အလယ်တန်းကျောင်း တက်တဲ့ အချိန်ထိ မုန့်စား ကျောင်းဆင်းချိန်မှာ ကလေးကို ကိုယ်တိုင် ထမင်းလိုက်ခွံ့ကျွေးတဲ့ မိဘမျိုး တွေကိုတောင်မှ တွေ့ရဖူးပါတယ်။

တကယ်တော့ ဒီလိုမျိုး နေရာတကာ လိုက်လုပ်ပေးနေခြင်းဟာ ကလေးတို့ကို ချစ်လို့ လိုက်လုပ်ပေးနေတာ ဖြစ်ပေမယ့် ချစ်ရာ မရောက်တဲ့ ချစ်နည်းဖြစ်တဲ့ အပြင် ကလေးတို့ရဲ့ စိတ်ထဲကို မှီခိုလိုတဲ့ (Dependency) စိတ် ထည့်သွင်းပေးနေသလို ဖြစ်နေတာကိုလည်း မသိကြပါဘူး။ ငယ်စဉ်ကတည်းက မှီခိုစိတ်ရှိနေတဲ့ ကလေးတို့ ကြီးပြင်းလာတဲ့ အခါမှာ ကိုယ့်အားကိုကိုး စိတ် မရှိတဲ့ လူညံ့လူဖျင်းလေးတွေ ဖြစ်လာနိုင်ပါတယ်။

တကယ်တော့ မိဘရဲ့ အကူညီကို အလုံးစုံ အပြည့်ဝ လိုအပ်တဲ့ အရွယ် ဆိုတာဟာ မွေးကာစ နို့စို့ကလေးများ ပါပဲ။  နို့စို့ အရွယ်က လွန်လို့ နည်းနည်းလောက်  ကြီးပြင်းလာပြီဆိုတာနဲ့  တပြိုင်နက်တည်း ကလေးတို့ ကိုယ်တိုင်လုပ် တတ်၊ လုပ်နိုင်အောင်လို့ မိဘများ အနေနဲ့ ကလေးဘေးက နေပဲ  ကူညီပေးဖို့ လိုပါတယ်။ ဘယ်အရွယ်လောက် က စရမလဲ ဆိုရင်တော့ လေးဘက်ထောက် အရွယ်လောက်ကပဲ စတင်ရမယ်လို့ ကလေးပြုစု စောင့်ရှောက်သူများနဲ့ ကလေး စိတ်ပညာရှင်များက ဆိုထားပါတယ်။

ဥပမာ- လေးဘက်ထောက် သွားတဲ့ အရွယ်ဆိုပါတော့။ ကလေးက အရုပ်လေး တရုပ်ကို လိုချင်လို့ လေးဘက်ထောက် ပြီးတော့ အရုပ် ဆီကို သွားပြီ ဆိုရင် မိဘက ကလေး သွားရတာ ပင်ပန်းမှာ စိုးလို့ ဆိုပြီးတော့ အရုပ်လေးကို ကလေးနားကို ရွှေ့ပေးတာမျိုး မလုပ်ရပါဘူး။ အရုပ်လေးဆီကို ကလေး ကိုယ်တိုင် လေးဘက်ထောင်ပြီးတော့ သွားချင်အောင်၊ ကိုယ်တိုင် အရုပ်လေးကို ဆွဲပြီးတော့ ယူနိုင်အောင်လို့ ဘေးကနေ အားပေးတိုက်တွန်း ပေးရမှာပါ။

ဒီိလိုမျိုး အရုပ်လေးဆီကို ကလေးကိုယ်တိုင်  လေးဘက်ထောက်ပြီးတော့ သွားခြင်းဟာ ကလေးရဲ့ လက်မောင်း၊ လက်ဖျံမှာ ရှိတဲ့ ကြွက်သားမျှင်ကြီးတွေ (Gross Motor skills) ကို သန်စွမ်း လာစေပါတယ်။ လေးဘက်တောက် အရွယ်မှာ ကလေးတို့ လေးဘက်ထောက် သွားလာခွင့် ရဖို့၊  လမ်းလျှောက်တဲ့ အရွယ်မှာ လမ်းလျှောက်ခွင့် ရဖို့ ဆိုတဲ့ ကိစ္စဟာ ကလေးတယောက်ရဲ့ ရုပ်ပိုင်းဆိုင်ရာ ဖွံ့ဖြိုးဖို့ အတွက် သိပ်ကိုမှ အရေးကြီးတဲ့ ကိစ္စရပ်ကြီး ပါပဲ။

စိတ်ပိုင်းဆိုင်ရာ ဖွံ့ဖြိုးမှု ဘက်က ကြည့်မယ် ဆိုရင်လည်း ကလေးဟာ အရုပ်လေးကို သူရအောင် ယူနိုင်လိုက်တဲ့ အတွက်ကြောင့်  သူ့ကိုယ်သူ ကျေနပ်တဲ့ စိတ်လေး ၀င်လာသလို၊ ကိုယ့်ကိုယ်ကို ယုံကြည်တဲ့ စိတ်လေးလည်း ကလေးရဲ့ စိတ်မှာ ဖွံ့ဖြိုးလာစေပါတယ်။ ဒါဟာ အရုပ်လေးတရုပ်ကို ကလေးဘာသာ သွားယူခြင်းကနေ ရလာတဲ့ အကျိုးကျေးဇူးပါပဲ။

မိဘက ကလေးကို ချစ်လို့ ဆိုပြီးတော့ ကလေး ဘာလေးပဲ လိုချင်ချင် အနားကို ယူပေးတာ၊ ၀မ်းလျားထိုးခွင့်၊ လေးဘက်ထောက်ခွင့် မပေးဘဲ ချစ်လို့ ဆိုပြီးတော့ တချိန်လုံး ချီပိုးထားတာတွေဟာ ကလေးတယောက်ရဲ့ ဖွံ့ဖြိုးမှု မိုင်တိုင် (mile stone) ကို အားနည်း သွားစေပါတယ်။

ဒီလိုပဲ ကလေးတို့ကို ဇွန်းလေးတွေ ကိုင်တတ်အောင်၊ ရေခွက်လေးနဲ့ ကိုယ့်ဘာသာ ရေကို ခပ်ပြီးတော့ ချိုးတတ် အောင်၊ အန္တရာယ် မရှိတဲ့ ကလေးရဲ့ တကိုယ်ရေစာ အလုပ်လေးတွေကို  သူ့ဘာသာသူ လုပ်တတ်ကိုင် တတ်အောင် လို့ မိဘများက ကူညီသင်ကြားပေးဖို့ လိုပါတယ်။ ၂ နှစ်ကျော် ၃ နှစ်လောက် ရောက်ပြီ ဆိုရင်ဖြင့် ဇွန်းလေးနဲ့ ဟင်းရည်လေးတွေကို ခပ်ပြီးတော့သောက်တတ်အောင် သင်ပေးလို့ရပါပြီ။

ဒီလို သင်ကြားပေးခြင်းဟာ ကလေးတို့ရဲ့ လက်ချောင်းလေးတွေမှာ ရှိတဲ့ ကြွက်သားမျှင်ငယ်လေးတွေ (fine motor skills) ကို သန်စွမ်း စေပါတယ်။ ဒါ့အပြင် လက်ရယ်၊ မျက်စိရယ် အတူတူ ပူးပေါင်းဆောင်ရွက်မှု လို့ ခေါ်တဲ့ ပူးပေါင်း လုပ်ဆောင်နိုင်မှုစွမ်းရည် (Coordination) ကိုလည်း ဖွံ့ဖြိုးတိုးတတ် စေပါတယ်။ ဒါတွေဟာ ကလေးတို့ ကျောင်းနေတဲ့ အရွယ်မှာ ခဲတံကို ကိုင်ပြီးတော့ စာရေးတတ်စေဖို့ အတွက် လေ့ကျင့်ပေးတဲ့ လေ့ကျင့်ခန်းများလို့ လည်း ဆိုလို့ရ ပါတယ် ။

စာရေးတဲ့ အချိန်မှာ ခဲတံကိုင်ဖို့ အတွက် လက်ချောင်းမှာ ရှိတဲ့ ကြွက်သားမျှင်ငယ်လေးတွေ သန်စွမ်းဖို့ လိုသလို၊ လက်မောင်းလက်ဖျံမှာ ရှိတဲ့ ကြွက်သားမျှင်ကြီးတွေလည်း သန်စွမ်းဖို့ လိုပါတယ်။ အဲဒီလိုပဲ မျက်စိနဲ့ လက် တသားတည်း ပူးပေါင်း ဆောင်ရွက်မှု ဆိုတဲ့ အပိုင်းကိုလည်း ကောင်းကောင်းလုပ်နိုင်ဖို့ လိုပါတယ်။ ဒါကြောင့်မို့လို့ လေးဘက်ထောက် အရွယ်ကစလို့ ကျောင်းမနေခင်မှာ ကလေးတို့ကို ဘယ်လို ပြုစုစောင့်ရှောက်ခဲ့သလဲ ဆိုတဲ့ ကိစ္စဟာ ကျောင်းစနေတဲ့ အချိန်မှာ ကလေးတို့ ခဲတံ ကိုင်နိုင်သလား၊ မကိုင်နိုင်ဘူးလား ဆိုတာနဲ့ ပတ်သက်မှု အများကြီး ရှိနေတာပါပဲ။

တကယ်တော့ ကလေးတို့ရဲ့ ဦးနှောက်လေးတွေဟာ မွေးကတည်း ကစလို့ အပြည့်စုံ ဖွံ့ဖြိုးပြီးတော့ ပါလာတာ မဟုတ်ပါဘူး။ အပြင်ရောက်မှ ဆက်လက် ဖွံ့ဖြိုးလာတာပါ။ တယောက်နဲ့ တယောက် ဉာဏ်ရည် ကွာခြားခြင်း တွေထဲက အကြောင်းကြီး တချက်ကတော့ ကလေးတို့ မွေးပြီးတော့ အပြင်ရောက်လာတဲ့ အချိန်မှာ ကလေးတို့ကို  ဘယ်လို လှုံ့ဆော်မှုတွေ လုပ်ပေးသလဲ၊ ဘာတွေကို ကိုယ်တိုင်လုပ်ကိုင် စူးစမ်းနိုင်အောင်လို့ ခွင့်ပေးသလဲ ဆိုတဲ့ အပေါ်မှာ မူတည်ပြီးတော့ ကွဲပြားသွားတာပါပဲ။ ကလေးတို့ ကို အန္တရာယ်မရှိလောက်တဲ့ အရာမှန်သမျှ ကိုယ်တိုင် လုပ်ကိုင်၊ စူးစမ်းခွင့် ပေးခြင်းဟာ တကယ်တော့ ကလေးတို့ရဲ့ ဦးနှောက် ဖွံ့ဖြိုးဖို့ အတွက် လေ့ကျင့်ပေးခြင်းပါပဲ။

ကျမတို့ နိုင်ငံက တချို့မိဘများ အနေနဲ့ ကလေးကို ချစ်လို့ ဆိုပြီးတော့ ကလေးကို ဘာမှ လုပ်ခွင့်ကိုင်ခွင့် မပေးဘဲနဲ့ နေရာတကာမှာ လိုက်လုပ်ပေးတတ်ကြပါတယ်။ ကလေးလုပ်နိုင်တဲ့ အရာကို ကလေးကို ကိုယ်တိုင် လုပ်ကိုင်ခိုင်းခြင်း ဟာ မချစ်ရာ၊ ရက်စက်ရာ မရောက်ပါဘူး။ လမ်းလျှောက်နိုင်ပြီ ဆိုတာနဲ့ ကလေးကို လမ်းလျှောက်စေတာ၊ ကိုယ့်ထမင်းကို ကိုယ့်ဘာသာ ခပ်စားစေတာ၊ ကလေးနိုင်လောက်တဲ့ ပစ္စည်းလေးတွေ ကလေးကို သယ်ခိုင်းတာဟာ တကယ်တော့ ကလေးတို့ရဲ့ ကြွက်သားတွေကို သန်မာစေရုံ သာမကဘဲ ကိုယ့်အားကိုယ်ကိုးစိတ်၊ ကိုယ့်ကိုယ်ကို ယုံကြည်တဲ့ စိတ်လေးတွေ ၀င်လာအောင်လို့ ကလေးတို့ကို လေ့ကျင့်ပေးခြင်းပါပဲ။

ကလေးတို့ရဲ့ ငယ်ဘ၀ဟာ တကယ်တော့ အင်မတန် အရေးကြီးလှ ပါတယ်။ ငယ်ဘ၀မှာ ဘာတွေကို ဘယ်လို သင်ယူလာခဲ့ သလဲ၊ ပတ်ဝန်းကျင် မိဘအသိုင်းဝိုင်းက ဘယ်လိုတွေ သွန်သင်ဆုံးမ လေ့ကျင့် ပေးလိုက်သလဲ ဆိုတဲ့ အပေါ်မှာ မူတည်ပြီးတော့ ကလေးတယောက် (လူတယောက်) ချင်းစီရဲ့ အရည်သွေးတွေ၊ အရည်ချင်းတွေ  ကွာခြား သွားကြတာပါပဲ။

တကယ်တော့ ကလေးတယောက်ကို ပြုစုပျိုးထောင် စောင့်ရှောက်တယ် ဆိုတာဟာ ကလေးတို့ ကျန်းမာရေး၊ ပညာရေးတို့ အပြင် ကလေးတို့ရဲ့ ရုပ်ပိုင်း၊ စိတ်ပိုင်းဆိုင်ရာ ကိုပါ ကျန်းမာ ဖွံ့ဖြိုးအောင်လို့ ထိန်းကျောင်း ပြုစုရတာပါပဲ။ အမှီခို ကင်းကင်းနဲ့ ကိုယ့်ခြေထောက်ပေါ်ကိုယ် ရပ်နိုင်အောင်၊ ကိုယ့်ကိုယ်ကို ယုံကြည်မှု ရှိအောင်၊ တာဝန်ယူတတ် အောင်လို့ ငယ်စဉ်ကတည်းက ကလေးတို့ကို သင်ကြားပေးဖို့ လိုပါတယ်။

ဒါကြောင့် မိဘများ အနေနဲ့ ကလေးတို့ကို ချစ်ရင် နေရာတကာ လိုက်မလုပ်ပေးဘဲ ကလေးတို့ကို ကိုယ်တိုင်လုပ်ခွင့်၊ ကိုင်ခွင့် လေးပေးကြပါ။ လုပ်ရင်း၊ ကိုင်ရင်းနဲ့ အန္တရာယ် မရှိလောက်တဲ့ အမှားမျိုး ( ဥပမာ-ထမင်းတွေ ဖိတ်ပြန့်ကျဲတာ၊ ရေတွေ မှောက်သွားတာ) စတာလောက်ကိုလည်း မှားခွင့် ပေးကြဖို့ လိုပါတယ်။

ကိုယ်တိုင် လုပ်ရင်းကိုင်ရင်း နဲ့ပဲ သူတို့ ကိုယ်တိုင် လုပ်တတ်၊ ကိုင်တတ်သွားတဲ့ အခါမှာ သူတို့ စိတ်ထဲမှာ ဖြစ်ပေါ်လာ မယ့် ကိုယ့်ကိုယ်ကို ယုံကြည်တဲ့ စိတ်၊ ၀မ်းသာကြည်နူးတဲ့ စိတ်လေးကို ကလေးတို့ ကိုယ်တိုင် ခံစားရစေဖို့ အတွက် ကလေးတို့ကို ကိုယ်တိုင် လုပ်ကိုင်ခွင့်လေး ပေးကြပါဦးလို့။     ။

ခေတ်ဘုန်းသစ်

ဧရာဝတီ Blog